Pas kontrolleve të djeshme për të gjetur armën e krimit me të cilën u vra 50-vjeçari, Alfred Dedja, policia e Tiranës do të rikthehet sërish ditën e sotme në vendin e ngjarjes. Kontrollet janë shtuar pas deklaratës së autorit, Julian Gjoshi se armën e krimit e ka hedhur në shkurre pranë lokalit ku u regjistrua vrasja.
Gjithashtu bëhet me dije se sot policisë së Tiranës do tu vijnë në ndihmë edhe Forca Kombëtare e Sigurisë. Mësohet se nëse FKS nuk e gjen sot armën, nuk përjashtohet mundësia që Julian Gjoshi të merret personalisht për të treguar vendin e saktë ku e ka hedhur. Ai ka rrëfyer gjatë dëshmisë së tij se krimin e ka kryer për shkak të ofendimeve të përsëritura që viktima 50-vjeçar i bënte atij në mënyrë të përsëritur.
Ngjarja e rëndë është regjistruar pasditen e 1 dhjetorit rreth orës 15:30 në një lokal në Ndroq. Në fillim u raportua për të shtëna ndërsa pak minuta më pas u raportua për një viktimë. Nga të shtënat mbeti viktimë Alfred Dedja ndërsa në lidhje me vrasjen është identifikuar autori 27-vjeçar Julian Gjoshi. Pas ngjarjes ai është arratisur me një “Benz” të zi. Sipas raportimeve ngjarja ka ndodhur pas një sherri në lokal. Autori është futur në lokal dhe është ulur përballë tavolinës së viktimës.
Më pas 50-vjeçari ka shkuar të flasë me të riun por situata ka agravuar dhe ata kanë debatuar. Gjatë debatit i riu ka nxjerrë armën dhe e ka qëlluar për vdekje. Gjoshi mësohet se është kunati i Altin Hajrit ndërsa në vitin 2021 ishte arrestuar për armëmbajtje pa leje. 50-vjeçari më parë merrej me aktivitetin e lojërave të fatit dhe vite më parë ka punuar edhe te kompleksi i Altin Hajrit në Shijak. Gjithashtu bëhet me dije se viktima ishte me precedentë penalë për vjedhje dhe trafikim i lëndëve narkotike.
