GJKKO ka marrë vendimin ditën e sotme duke dënuar me 1 vit burg ish-prefektin e Kukësit, Granit Gjanën.
Ndërkohë dënimi me 1 vit burg iu konvertua në 2 vite shërbim prove. Granit Gjana, ka mbajtur detyrën e prefektit të Kukësit, zëvendës kryetarit të bashkisë është akuzuar nga SPAK për “Shkelja e barazisë së pjesëmarrësve në tendera apo ankande publike”, në dy raste.
Prokuroria e Posaçme kishte kërkuar 1 vit e 6 muaj burg për ish-nën kryetarin e Bashkisë Kukës Granit Gjana, për “shkelje të barazisë në tendera” në dy raste. Për shkak të gjykimit të shkurtuar, Gjana përfiton ulje të dënimit në 1 vit. Gjithashtu SPAK kërkoi konvertimin e dënimit me 2 vite shërbim prove.
Më 6 dhjetor 2023 u bë publik vendimi i GJKKO për pezullimin e Granit Gjanës nga detyra si prefekt i Kukësit nën akuzën se gjatë kohës që ka mbajtur postin e zëvendës kryetarit, ka kryer shkelje me tenderat e karburantit të bashkisë me vlerë 21 milionë lekë, duke mos lejuar një kompani të marrë pjesë në garë.
Sipas SPAK, Granit Gjana me mospaisjen në kohën e duhur me Autorizimin për tregtimin e lëndëve djegëse, edhe pse subjekti “Ufo Cengu” sh.p.k, i kishte kryer pagesat e nevojshme dhe dorëzuar dokumentacionin pranë organit shtetëror sipas ligjit, e ka penguar kompaninë të kualifikohet në dy procedurat e tenderit me objekt “Blerje karburanti”, në vlerën 21 milionë lekë të organizuara nga Bashkia Kukës përgjatë vitit 2023.
