Janë zbardhur detaje të reja nga atentati me 4 viktima i regjistruar pasditen e 30 Tetorit në afërsi të Dobraçit në Shkodër, ku humbën jetën 23-vjeçari Hamza Lici dhe 31-vjeçari Arlind Bushati, të cilët ranë pre e breshërisë së kallashnikovit në momentin kur po udhëtonin me një automjet tip “Benz” me targa kroate.
Po ashtu, viktima aksidentale mbetën dhe çifti i bashkëshortëve Bashkim dhe Flutura Basha, të cilët po udhëtonin me motor në momentin kur u përplasën nga automjeti me të cilin po udhëtonin dy viktimat e tjerë. Dyshohet dhe për një të plagosur, i ndodhur në automjet me viktimat, ku përflitet për Ibrahim Licin, por deri më tani ende e pakonfirmuar.
Burime për mediat bëjnë me dije se autoritetet policore kanë arrestuar autorin e grabitjes së automjetit tip “Range Rover”, i përdorur nnë atentat nga autorët dhe që u gjet më pas i djegur tek zona e ish-repartit ushtarak në fshatin Golem të njësisë Rrethina.
Automjeti ishte grabitur në qytetin e Durrësit, teksa burime bëjnë me dije se arrestimi i autorit është kryer rreth dy javë më parë, identiteti i të cilit ende nuk dihet, por është mbajtur i fshehtë nga ana e Policisë me qëllim zbardhjen e atentatit të Dobraçit.
Burime bëjnë me dije se ai është marrë disa herë në pyetje nga grupi hetimor për të treguar nëse ka djeni për rrethanat e atentatit me 4 viktima në Dobraç, por në asnjë moment ka pranuar të japë deklarime.
Automjeti “Range Rover” rezultoi të ishte vjedhur dhe denoncuar nga pronarët më 17 prill të këtij viti.
Kujtojmë se Prokuroria e Shkodrës shpalli moskompetencë për atentatin e Dobraçit dhe krimi i rëndë tashmë po hetohet nga Prokuroria e Posaçme (SPAK).
