Personat që shihni në fotot e mësipërme janë dy vëllezërit Florjan Dukaj, 45 vjeç dhe Shkëlqim Dukaj, 48 vjeç, të cilët u arrestuan si autorë të vrasjes së biznesmenit Eduart Reçi, 52 vjeç.
Ky i fundit u ekzekutua me plumb në kokë me armë zjarri me dylbi mbrëmjen e 13 nëntorit në shesh pushimin e pallatit të ndërtuar prej tij në rrugën “Faik Konica” pranë Fakultetit të Historisë dhe Filologjisë në Tiranë.
Burime për mediat pranë grupit hetimor bëjnë me dije se ka qenë Shkëlqim Dukaj, i cili është oficer policie, ai i cili ka qenë në rolin e ekzekutorit në vrasjen e biznesmenit Eduart Reçi. Mësohet se grupi hetimor pas provave ka përcaktuar edhe vendin se prej nga është qëlluar 52-vjeçari.
Sipas autorieteve policore Eduart Reçi është ekzekutuar për motive pronësie, për shkak të një pallati që kishte planifikuar të ndërtonte.
“Nga veprimet hetimore të kryera ka rezultuar se shtetasi Eduart Reçi, po angazhohej për të ndërtuar një pallat, ndërtimi i të cilit kërkonte bashkëpunim dhe dakortësim edhe me persona të tjerë (kufitar me pronën e viktimës). Ndër personat me të cilët shtetasi Eduart Reçi, kishte diskutuar lidhur me këtë problematikë dhe ka pasur konflikt mbi pronësinë e truallit, janë vëllezërit Florjan Duka, dhe Shkëlqim Duka.” – thuhej në njoftimin e bluve të kryeqytetit.
Ditën e djeshme uniformat blu kanë ushtruar kontroll në ambientet e lokalit dhe banesës së dy vëllezërve dhe në magazinën e lokalit janë gjetur një armë zjarri pjesërisht e dëmtuar, gjashtë objekte cilindrike te ngjashme me silenciatorë me përmasa të ndryshme, pjesë dhe mekanizma të ndryshëm që përdoren për silenciatorët, dy jelekë antiplumb dhe pajisje të ndryshme elektronike.
Të gjitha armët dhe pajisjet që shihni dhe në videon e mëposhtme janë sekuestruar në cilësinë e provës materiale, dhe sipas autoriteteve ato dokumentojnë veprimtarinë dhe dinamikën e autorëve të dyshuar të kësaj ngjarje.
Mbi dy vëllezërit rëndojnë akuzat për veprat penale “Vrasja me paramendim” e kryer ne bashkëpunim dhe “Mbajtja pa leje dhe prodhimi i armëve, armëve shpërthyese dhe i municionit”.
