Vrasja e 14-vjeçarit Martin Cani ka shokuar të gjithë opinionin publik, ndërsa është njoftuar një protestë ditën e enjte, në orën 11:00.
Marshimi do të fillojë nga shkolla “Fan Noli” drejt Ministrisë së Arsimit.
Prindër, mësues dhe qytetarë të shumtë të prekur nga ngjarja tragjike pritet të marrin pjesë në protestë për jetën, sigurinë dhe arsimin e fëmijëve.
Viktima, i cili sapo kishte mbaruar mësimin, rreth orës 13:10 minuta të së hënës dhe po ikte për në shtëpi së bashku me një shokun e tij, u sulmua nga një bashkëmoshatar.
Fillimisht të miturit janë ofenduar me njëri-tjetrin dhe më pas sherri ka degraduar deri në përdorimin e thikës.
Martin Cani është goditur nga autori me thikë në zemër dhe në bark, duke i shkaktuar plagë të rënda. Pasi është goditur me thikë, i mituri është afruar tek shkolla. Ka ecur disa metra dhe ka nisur të humbë gjak, më pas këmbët nuk i janë bindur dhe është rrëzuar në trotuarin para shkollës.
Menjëherë nxënësi i shtrirë në tokë është rrethuar nga fëmijët e tjerë të shkollës “Fan Noli”, që janë përpjekur t’i ndalin gjakderdhjen nga plaga në pjesën e majtë të stomakut.
Pak minuta pasi ka qëndruar i shtrirë në trotuar, me plagën që rridhte gjak, Martin Cani ka humbur ndjenjat. Në këto momente, nxënësit e tjerë që i qëndronin përreth janë tmerruar. Një pjesë kanë nisur të qajnë, të tjerë vrapuan të lajmërojnë mësuesit, disa kanë marrë në telefon ambulancën, ndërsa disa policinë.
Kanë qenë kalimtarët e rastit, ata të cilët në momentin kur e kanë parë të miturin që ka humbur ndjenjat, e kanë marrë dhe e kanë dërguar në spitalin e Traumës, por ishte tepër vonë, pasi i mituri ndërroi jetë, duke mos iu mbijetuar plagëve të marra.
Edhe shoku i tij, shtetasi L. M. ka marrë plagë thikë në gjoks dhe ndodhet në spital në gjendje stabël.
Ndërkohë, autori u vu pranga për “Vrasje me dashje e kryer ndaj të miturit” dhe “Prodhimi, mbajtja, blerja apo shitja pa leje e armëve të ftohta”.
