Autoritetet policore raportojnë se kanë arrestuar drejtuesen e automjetit që përplasi mbrëmjen e djeshme një efektiv të Policisë Rrugore në tunelin e Kërrabës në autostradën Tiranë-Elbasan.
Polici i Rrugores ka qenë duke dokumentuar përplasjen e dy automjeteve në tunel, që ishin aksidentuar më herët, në momentin kur është përplasur nga makina.
Burimet zyrtare bëjnë me dije se në pranga është vënë shtetasja S. Sh., 21 vjeçe, banuese në Elbasan. Në momentin kur ka përplasur efektivin e Rrugores, shoferja e re dyshohet se ka qenë në efektin e lëndëve narkotike.
“Më datë 14.11.2024, rreth orës 21:15, në fshatin Ibë, kjo shtetase, duke drejtuar automjetin, dyshohet në efektin e lëndëve narkotike, ka aksidentuar një punonjës të Komisariatit të Policisë Rrugore në shërbim, i cili ishte po kryente veprimet procedurale për një aksident.” – thuhet në njoftimin e Policisë.
Materialet proceduriale i kaluan Prokurorisë së Tiranës për veprime të mëtejshme.
