Deputeti i PL-së, Petrit Vasili, njëkohësisht anëtar i Komisionit të Posaçëm Hetimor Parlamentar për koncensionet në shëndetësi është shprehur se dëshmitarët kanë sajuar arsye nga më të ndryshmet për t’iu shmangur procesit të marrjes në pyetje nga ky komision.
I ftuar në Syri TV, Vasili tha se mazhoranca në Komision është bërë barrikadë për të mos u pyetur persona kyç, të cilët kanë lidhje me aferën e PPP-ve në Shëndetësi.
Sipas Vasilit, Kryeministri Rama dhe Vilma Nushi po i shmangen hetimit, kjo edhe falë ‘vullnetit’ të mazhorancës për ta penguar atë.
“Kanë sajuar të gjitha llojet e sebepeve për t’u shmangur. Duhet një zgjatje minimaliste e komisionit për zbardhjen e elementëve thelbësorë të kësaj afere, cenohet hetimi dhe nga tentativa e shmangies së dëshmitarëve në komision. Mazhoranca është bërë barrikadë për të mos u pyetur persona kyç.
Vilma Nushi nuk paraqitetet se ka dhënë porosi Rama me shokë. Ka një vullnet shumë të fortë të mazhorancës për të penguar hetimin. Dëshmitarë kyç si Nushi, është edhe Rama. Ka pasur rol kyç, ka pasur informacione për mbi 100 mln euro. Pas çështjes që u hap, Rama bëri avokatinë e kësaj afere me këmbëngulje. Është minimalisht e domosdoshme që Rama të dëshmojë në komisionin hetimor, ka bërë një avoktai intensive, duke qenë kokë e këmbë brenda këtij koncensioni.
Roli i drejtuesve dhe institucioneve shtetërore ëshët vendimtar dhe përcaktues në këtë aferë. Të bësh një kontratë, duhet studim fizibiliteti, duhet të bësh pazar dhe kjo udhëhiqet nga shteti. Simbioza privat-shtet, përgjegjësitë maksimale bien mbi institucionet dhe drejtuesit shtetëror“, tha Vasili.
