Greqia pati uljen më të madhe të taksave midis vendeve të BE-së në vitin 2023, në raport me Prodhimin e Brendshëm Bruto. Sipas Eurostat, të dhënat tregojnë një reduktim nga 42.8% në 40.7% vitin e kaluar.
Raporti i përgjithshëm i taksave në raport me PBB-në, që do të thotë shuma e taksave dhe kontributeve sociale neto si përqindje e Produktit të Brendshëm Bruto, pësoi një rënie të lehtë edhe në Bashkimin Evropian, në 40.0%, krahasuar me 40.7% në 2022.
Kryeministri grek Kyriakos Mitsotakis njoftoi shkurtime të mëtejshme të taksave ndërsa ekonomia vendase po shkon drejt stabilizimit. Ai theksoi nevojën për të ulur TVSH-në dhe normat e tatimit mbi të ardhurat deri në fund të mandatit të tij në 2027.
“Sa më shumë zvogëlohet hendeku i TVSH-së dhe zbulohet mashtrimi tatimor, aq më shumë të ardhura do t’i shtohen shtetit në mënyrë që ne të mund të ulim taksat. Ky është synimi ynë deri në fund të mandatit të qeverisë në vitin 2027,” tha Mitsotakis.
Lehtësimi i parashikuar i taksave përputhet me reformat e vonuara që nga viti 2019 për shkak të krizës pandemike dhe energjetike.
Ndryshimet e propozuara përfshijnë uljen e TVSH-së dhe lehtësimin e barrës tatimore për personat me të ardhura mesatare, grupe të anashkaluara më parë në reduktimet e fundit. Qeveria synon gjithashtu të trajtojë pabarazitë në taksat për “standardet të jetesës”, një metodë që përdor vlerat e të ardhurave të caktuara dhe jo të ardhurat aktuale. Mbi 1.4 milionë tatimpagues grekë, veçanërisht punonjës dhe pensionistë janë prekur nga kjo përllogaritje, me detyrime shtesë tatimore që arrijnë në 4.4 miliardë euro, sipas të dhënave të fundit buxhetore.
Për më tepër, qeveria ka premtuar një ulje të mëtejshme të kontributeve të sigurimeve shoqërore, duke arritur në total një reduktim prej gjashtë pikë përqindjeje deri në vitin 2027.
