Prokuroria e Posaçme ka përfunduar hetimet paraprake dhe ka dërguar për gjykim çështjen e oficeres së Policisë Gjyqësore pranë Prokurorisë së Elbasanit, Anila Dushku.
Ajo është marrë e pandehur për veprën penale “Korrupsioni pasiv i gjyqtarëve, prokurorëve dhe funksionarëve të tjerë të organeve të drejtësisë”.
Oficerja Anila Dushku u denoncua mbrëmjen e 10 shtatorit nga emisioni “Fiks Fare” për një rast korrupsioni. Anila Dushku i mori 1 mijë euro ryshfet 68-vjeçares Hava Lloga, me premtimin për “t’i mbaruar” punë, për t’i mbyllur çështjen gjyqësore.
Hava Lloga para disa vitesh ishte proceduar penalisht dhe u dënua me 2 muaj arrest shtëpie për ndërtim pa leje, për shkak se ndërtoi një banesë për vete dhe djalin në fshatin Qendër Librazhd.
68-vjeçarja shkoi dhe ia dha me zarf 1 mijë eurot oficeres së Policisë Gjyqësore, Anila Dushku dhe kjo e fundit i tha se vendimi do t’i vijë me zarf, që do t’i njoftohej mbyllja e çështjes.
Ndërkohë, në vendimin e prokurorit Xhelian Seferi shkruhej se ndërtimet janë pa leje, por ato ndërtime janë bërë para datës 31 mars 2024 dhe vepra penale “ndërtim i paligjshëm” është amnistuar nga Kuvendi i Shqipërisë. Pra, qytetarja i ka paguar OPGj-së shumën prej 1 mijë eurosh, megjithëse vepra penale ishte amnistuar dhe prokuroria duhet të kishte marrë vendim shumë kohë më përpara!
“Nga të dhënat konkrete të grumbulluara gjatë hetimit paraprak për këtë procedim penal, ekziston dyshimi i arsyeshëm bazuar në prova, se ka qenë e pandehura Anila Dushku me detyrë Oficere e Policisë Gjyqësore në Prokurorinë pranë Gjykatës së Shkallës së Parë të Juridiksionit të Përgjithshëm Elbasan, e cila ka pasur një rol aktiv të kundërligjshëm në bisedat me shtetasen Hava Lloga, duke i udhëzuar vendin dhe datën e takimit si dhe dorëzimin e shumës së parave [mitës].” – thuhet në njoftimin e SPAK.
