Janë zbardhur detaje të reja nga ngjarja e rëndë që u regjistrua mbrëmjen e djeshme në Shkodër, ku u vra me thikë një 15-vjeçar nga një bashkëmoshatar i tij.
Viktima është minoreni Emiljano Gjoni, i cili ndërroi jetë në spital. Disa orë pas ngjarje, blutë e Shkodrës shoqëruan edhe autorin e krimit, i cili në prani të psikologut ka rrëfyer versionin e tij për atë se çfarë kishte ngjarje.
Burime për mediat bëjnë me dije se 15-vjeçari ka treguar se me viktimën janë takuar rastësisht në zonën e Fermentimit, në lagjen “Skenderbeg”. Sipas tij, ai Emiljano Gjonin e njihte vetëm si emër, por jo se kishte pasur kontakte më parë me të.
Dyshohet se mes dy 15-vjeçarëve ka patur përleshje me njëri-tjetrin, pasi edhe autori i krimit kishte një plagë thikë në supin e majtë, pa probleme për jetën. Viktima ka marrë vetëm një goditje me thikë, e cila i ka sjellë vdekjen.
Blutë e kryeqendrës së veriut besojnë se autori nuk ka vepruar i vetëm, por mund të ketë patur edhe bashkëpunëtorë. Për të zbuluar këtë rrethanë hetuesit kanë nisur me këqyrjen te vendit të ngjarjes dhe marrjes së kamerave të sigurisë.
Ende nuk dihet motivi që i ka shtyrë dy 15-vjeçarët për t’u përleshur me njëri-tjetrin.
