Policia e Korçës ka arrestuar një person, i cili u shpall në kërkim në fillim të këtij muaji. Në pranga është vënë shtetasi Matheos Dërsniku, 33 vjeç, banues në Korçë.
Më datën 27 shtator, Matheos Dërsniku nuk i është bindur urdhrit të punonjësve të Policisë, për të ndaluar automjetin, dhe është larguar me shpejtësi.
Më pas, në datën 3 tetor, blutë e qytetit juglindor me vendim të Gjykatës së Korçës ushtruan kontroll në banesën e 33-vjeçarit, ku gjetën dhjetëra doza të lëndës së narkotike kokainë dhe 1 peshore elektronike, por Matheos Dërsniku nuk u gjet në banesë dhe u shpall në kërkim.
Gjithashtu, nga veprimet hetimore dyshohet se 33-vjeçari ushtronte veprimtarinë e paligjshme të lojërave të fatit, me celular.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
