Policia e Tiranës ka dalë me një komunikatë për mediat në lidhje me plagosjen e regjistruar pasditen e sotme, rreth orës 18:00, në rrugën “4 Dëshmorët” në kryeqytet.
Burimet zyrtare bëjnë me dije se shtetasi Eljot Xhafa, rreth 40 vjeç, ka goditur me thikë shtetasin Agron Doçi, 60 vjeç.
Krimi dyshohet se ka ndodhur pas një konflikti të çastit, teksa të dy personat kanë qenë në një lokal, në të njëjtën tavolinë duke pirë alkool.
I plagosuri është transportuar me urgjencë në spital, ndërsa autori Eljot Xhafa, me precedent të mëparshëm penal, është shoqëruar në komisariat për veprime të mëtejshme.
Grupi hetimor ndodhet në vendngjarje dhe po punon për sqarimin e rrethanave të ngjarjes.
