Fshati Dritas të cilin e mbulon bashkia Tiranë dhe që njihet ndryshe edhe si Tapizë është pa rrugë, pa ujë dhe energji elektrike. Emisioni “Fol” u ndalën me banorët e këtij fshati, të cilët thonë se shteti nuk i ka në listë.
Banorët thonë se kanë paguar te Fondi Shqiptar i Zhvillimit por rruga nuk është bërë edhe pse fshati ka mbi 300 shtëpi, të cilat janë lënë pa rrugë.
“Ne kemi trokitur në fillim te Fondi Shqiptar i Zhvillimit që në vitin 2012. Erdhën ata të Fondit Shqiptar të Zhvillimit, na thanë të shtonim një pjesë ne dhe pjesën tjetër do e shtonte fondi. Paguam nga 700 mijë lekë për familje, 45 familje, i paguam me fatura dhe me mandat. Atëherë ka qenë kryetar Benet Beci, që është sot kryebashkiak i Shkodrës. Është paguar fondi, të bëhet rruga ose të na kthehen lekët. Sa të bjerë shi rruga bëhet e pakalueshme. I çuam peticion bashkisë Tiranë, asnjë përgjigje. Nuk kemi korrent, po fryu erë rrimë gjithë natën pa drita. Drita jo, ujë jo, rrugë jo.”
Një tjetër banor kujton se si ish-deputeti Pajtim Bello iu bëri një kabinë për energjinë elektrike, me paratë e veta dhe se në 34 vite është i vetmi që është kujtuar për ta dhe se gjithçka e bëri për humanizëm.
Por banorët shprehin shqetësim se pajisjet e reja iu digjen nga tensioni, për shkak se OSHEE nuk ndërhyn në rrjetin elektrik, edhe pse fshati i paguan faturat rregullisht.
“Nuk kemi as ujë, rrofshin puset. Qendër shëndetësore këtu nuk kemi, vetëm në Tapizë. Të kesh urgjencë do dy orë të shkosh në QSUT. Makina u bë copë copë. Vdiq fqinji rrugës për në spital. Është turp, të bëhet rruga në majë të malit dhe këtu jo! Pse nuk e bën rrugën këtu, taksat t’i paguaj.
Çdo familje ka paguar miliona për puse. Rrugën që shikon e kemi shtruar vetë. Njerëzit na vijnë vetëm për vdekje. Shqiptarët ikin se këtu s’ka si të jetojnë. Secili do të jetojë në vendin e vetë jo të bëhet skllav. Bujqësia ka mbaruar, është pa vaditje. Bashkia taksat i merr, por shërbime nuk jep. Në Çekrezë kanë çuar asfaltin për një lokal. Ka një çik korrupsion, është diçka, ka interesa.
Ne nuk na kanë në listë. Edhe kabllot e korrentit i kemi blerë vetë. OSHEE vjen na merr lekët dhe asnjë investim. Shtyllat janë rrezik për jetën. Pas hyrjes së demokracisë u shkatërruan. Plehrat i groposim në bahçe ose i djeg, nuk ka kosha. I bëj thirrje kryeministrit: Mos mendo vetëm për qytetin ku bëhen ndërtime. Hidhi sytë dhe nga ne.”
