Prokuroria e Posaçme ka dhënë pretencën për ish-kryebashkiakun e Lushnjes, Fatos Tushe, në lidhje me akuzën e mosdeklarimit të pasurisë.
SPAK ka kërkuar dënimin e Tushes me 1 vit e 5 muaj burgim, por për shkak të gjykimit të shkurtuar do të përfitonte zbritjen e dënimit me 1/3. Ai akuzohet se nuk ka deklaruar një apartament në bregdetin e Vlorës, duke e fshehur në deklarimet e pasurisë.
Hetimet ndaj tij për këtë akuzë nisën vetëm pak muaj pasi ai shleu dënimin me 3 vite e 4 muaj burg për shpërdorim detyre dhe shkelje të barazisë në tenderë
Fatos Tushe u arrestua më 6 korrik të vitit 2021, bashkë me ish-vartësit e tij, nga një operacion i ndërmarrë nga SPAK, për akuzën e shpërdorimit të detyrës në lidhje me abuzimet me tenderat.
Në korrik të vitit 2022 ai u dënua nga GJKKO me 2.4 vite burgim vetëm për akuzën e “shpërdorimit të detyrës kryer në bashkëpunim”, ndërsa e shpalli të pafajshëm për veprën penale “Shkelje e barazisë së pjesëmarrësve në tendera apo ankande publike” e kryer në bashkëpunim, edhe pse SPAK kishte kërkuar dënimin e tij me 5 vite burgim.
Në Janar të vitit 2023 ai la qelinë e burgut pas përfundimit të dënimit, teksa në muajin Mars të vitit 2023 ai u rikthye sërish në burg. Kjo për shkak se Apeli i Posaçëm e shpalli të fajshëm edhe për akuzën e veprës penale “Shkelje e barazisë së pjesëmarrësve në tendera apo ankande publike”, duke i shtuar edhe 1 vit burgim.
