Që nga e mërkura e 11 shtatorit 2024 rezulton i zhdukur 72-vjeçari, Mark Joris, me shtetësi Belge. Ai ka ndjekur një shteg ndërkufitar midis Maqedonisë së Veriut dhe Shqipërinë në malin e Jabllanicës.
E bija e tij, Tina Joris, së bashku me stafin e AdZM Elbasan dhe grupi të kërkim shpëtimit Malor të Federata Shqiptare e Alpinizmit, prej më shumë se dy javësh po kërkojnë ne malet e Shebenikut përgjatë kufirit me Maqedoninë e Veriut.
Familjarët thonë se ai është nisur nga Peshkopia përgjatë kufirit me Maqedoninë e Veriut drejt Jabllanicës (Kallkanit) dhe ka humbur prej 13 Shtatorit çdo kontakt, ditë kjo me mot me stuhi dhe breshër.
Bazuar në informacionet e deritanishme turisti i huaj ka qenë si vizitor në 13 Shtator në “Stanet e Hinoskës” dhe prej andej nuk ka më informacione të sigurta për rrugëtimin e mëtejshëm të tij, ndërkohë që në 17 Shtator turisti belg duhet të fluturonte nga Rinasi drejt Brukselit.
Vajza e tij thotë se Mark Joris mendohet që të jetë nisur drejt Kallkanit në Parkun Kombëtar të Shebenikut me qëllim ndjekjen e shtegut ndërkufitar midis Shqipërisë dhe Maqedonisë së Veriut me destinacion Ohrin dhe Parkun e Pelisterit në shtetin fqinj.
Tina Joris se bashku me stafin e ADZM, Elbasan dhe grupin e shpëtimit të Federatës Shqiptare të Alpinizmit prej ditës së djeshme po zhvillojnë operacione kërkimi të përbashkëta në parkun Kombëtar të Shebenikut përgjatë gjithë vijës kufitare me Maqedoninë e Veriut. Fatmir Brazhda, Drejtor i Administratës Rajonale të Zonave të Mbrojtura Elbasan dhe një pjesë e stafit të tij ditën e sotme së bashku me disa efektivë të Komisariatit të Policisë së Librazhdit janë mobilizuar me grupe kontrolli me dron përgjatë kufirit Shqipëri-Maqedoni e Veriut si edhe në të gjitha shtigjet e masiveve pyjore Peshkopi-Librazhd.
