Nga Boldnews.al
Kompania ndërtuese, “S.M.O Union”, në pronësi të Fernand Nuha, është përjashtuar për 15 muaj nga pjesëmarrja në tendera, pasi Agjencia e Prokurimit Publik zbuloi se ka paraqitur dokumenta të rreme për t’u shpallur fitues në një procedurë të zhvilluar në vitin 2023 nga Bashkia e Krujës.
Në 19 Shtator 2024, APP ka miratuar vendimin nr. 85, në të cilin njofton se ka marrë masën e rëndë penalizuese për shoqërinë me seli në Shkodër.
Sipas Agjencisë së Prokurimit Publik, kompania që merret, ndër të tjera edhe me ndërtim, ka “keqinformuar për qëllim kualifikimi” në tenderin me objekt “Sistemim-asfaltim i rrugës “Bregu i Lumit” (dydegëshi) fshati Gramëz, Nj.A.Thumanë, Krujë”.
Kjo procedurë është zhvilluar në vitin 2023, me fond limit 270 milionë lekë të vjetra. Në përfundim, shoqëria “S.M.O Union” është shpallur fituese.
Tenderi problematik
Të dhënat zyrtare nga Agjencia e Prokurimit Publik tregojnë se Bashkia e Krujës ka shpallur procedurën në datën 9 mars 2023. Në tender kanë marrë pjesë 9 operatorë ekonomikë.
Në përfundim, kryetari i Bashkisë së Krujës, Artur Bushi, ka shpallur fitues shoqërinë nga Shkodra, e cila rezulton se ka paraqitur ofertën më të ulët ekonomike, në vlerën 188 milionë lekë të vjetra.
Agjencia e Prokurimit Publik thotë se ka nisur hetimin administrativ mbi këtë procedurë. Në përfundim, është arritur në konkluzionin se “S.M.O Union” ka keqinformuar për qëllime kualifikimi.
Pasi është konstatuar kjo shkelje, APP ka vendosur ta përjashtojë shoqërinë private për 15 muaj nga pjesëmarrja në tendera publikë, referuar nenit 78, pika 1 e ligjit “Për prokurimet publike”.
Profili i kompanisë
Kompania ‘S.M.O Union” është regjistruar në vitin 1997 dhe selinë e ka në Beltojë, të Shkodrës. Ajo zotërohet në masën 100 përqind nga Fernand Nuha.
Sipas të dhënave të portalit informativ “spending.data”, kompania “S.M.O Union” ka përfituar mbi 12 milionë euro nga tenderat e fituar në institucionet publike për periudhën 2019-2024.
Referuar të dhënave publike, pjesa e rëndësishme e këtyre tenderave janë zhvilluar nga Fondi Shqiptar i Zhvillimit dhe një pjesë tjetër nga Bashkia e Krujës, nën drejtimin e Bushit.
