Kreu i Grupit Parlamentar të Partisë Demokratike, Gazment Bardhi, hodhi akuza të forta nga gjyqtarit të Apelit, Gent Shala, pas vendimit për të lënë në fuqi dënimin me 1 vit burg për Ervin Salianjin.
“Se do të shkojë Genc Shala në Gjykatë të Lartë, kupton?. Dhe mendon që do ta mbështesë Fatmir Xhafaj. Kjo është vendimmarrja e Gjykatës së Apelit. Kjo është e vërteta. Merr dy dëshmitarë të rremë, si në gjyqet politike, dëno deputetët e opozitës në këmbim të shkuarjes në Gjykatë të Lartë. Ta harrojë se do të shkojë në Gjykatë të Lartë, ai dhe të tjerët”, tha Bardhi në sallën e gjyqit.
Të enjten, Gjykata e Apelit la në fuqi dënimin e shpallur në Shkallën e Parë për Salianjin, 1 vit burg për kallëzim të rremë, në dosjen e ashtuquajtur “Babale”. Pas këtij vendimi, Salianji humbet edhe mandatin e deputetit, për shkak të ligjit të dekriminalizimit, që ndalon personat e dënuar me vendim të formës së prerë për të ushtruar funksione publike. Në të njëjtën çështje, Gjykata e Apelit dënoi me 100 orë punë në komunitet gazetarin Jetmir Olldashi.
