Gazetari Basir Çollaku është shprehur se agjentët e FBI-së kanë mbi një muaj në Tiranë për të hetuar për çështjen “McGonigal”, për gjobëvëniet e shumta të kryera prej tij ndaj bizneseve.
Komentet Çollaku i bëri në Euronews Albania, ku tha se në SHBA çështja McGonigal është mbyllur, ndërsa në Shqipëri nuk ka asnjë veprim për këtë çështje dhe për bashkëpunimin e kryeministrit Edi Rama me ish-agjentin e FBI-së.
Ai shtoi se ka me qindra miliona euro të vjedhura nga paratë publike nga ekipi i Charles McGonigal dhe veprime nuk ka.
“Është regjistruar në janar 2022 çështja ‘McGonigal- Rama’. Drejtësia amerikane ka mbaruar punë në 2 shtete me këtë person. Ka pranuar akuzat, në bashkëfajsi është me kryeministrin e vendit. Ka mbi 1 muaj që agjentët e FBI janë në Tiranë që merren me këtë histori. Për gjobvëniet, janë dhjetëra milionë euro gjobëvënie bizneseve në Shqipëri, Kosovë, Maqedoni të bëra nga ekipi i Charles me shokë. Rama duhet të pyetet. Veç kësaj janë licencat për bizneset, është historia e naftës me rusë e kinezë. Ai Deripaska ka edhe biznese të tjera këtu, të padala në këtë histori. Këto janë fakte publike, me qindra milionë euro të rrjepura nga paratë publike dhe veprime nuk ka.”, tha Çollaku.
Ndër të tjera, gazetari Basir Çollaku tha se një pjesë e prokurorëve dhe gjyqtarëve të SPAK dhe GJKKO janë pjesë e dosjeve që kanë dalë nga përgjimet e sjella nga partnerët evropianë. Sipas tij, në përgjime ka edhe emra ministrash e deputetësh që qëndrojnë prej 1 viti e gjysmë në SPAK dhe nuk hetohen.
“Një pjesë e prokurorëve dhe gjyqtarëve janë të inkriminuar, mbi bazën e materialeve që ata i kanë të ardhurave nga perëndimi, nga Franca, Holanda dhe Belgjika ku prokurorë të SPAK dhe GJKKO janë pjesë e dosjeve dhe po mbrojnë njëri-tjetrin, kanë dalë në përgjime duke folur me trafikantë me banditë dhe ne merremi pse mi pagoi ilaçet mua fëmija. Kjo nuk është drejtësi, është inkuzicion. Ka edhe për deputetë, ka edhe për ministra dhe janë prej 1 viti e gjysmë aty. Janë të zbardhura, i kanë me emra dhe mbiemra.”, tha gazetari.
