Emiratet e Bashkuara Arabe do të investojnë në energjitikë në vendin tonë. Lajmin e ka bërë me dije kryeministri Edi Rama, i cili ka takuar në New York, ministrin e Industrisë dhe Teknologjisë së Avancuar të Emirateve të Bashkuara Arabe, Sultan Ahmed Al Jaber.
Në një postim në rrjetet sociale, Rama thotë se Shqipëria do të krijojë me Emiratet e Bashkuara Arabe një kompani të përbashkët të prodhimit energjitik KESH&MAZDAR.
Po ashtu, kreu i qeverisë thotë se me të kanë diskutuar edhe për ndërtimin e linjës nënujore të transmetimit të energjisë me Italinë, në një bashkëpunim tripalësh Shqipëri-EBA-Itali.
“New York – Me mikun e çmuar Sultan Ahmed Al Jaber, Ministër i Industrisë dhe Teknologjisë së Avancuar të Emirateve të Bashkuara Arabe, për dy projektet e mëdha të energjisë që po finalizojmë bashkarisht, krijimin e kompanisë së përbashkët të prodhimit energjitik KESH&MAZDAR, e cila do të ketë një portofol të ri ambicioz investimesh në Shqipëri e në rajon dhe së dyti, ndërtimin e linjës nënujore të transmetimit të energjisë me Italinë, në një bashkëpunim tripalësh Shqipëri-EBA-Itali” – shkruan Rama.
