Deputetja e Partisë Demokratike, Jorida Tabaku, e ka konsideruar një lajm jo të mirë marrjen si të pandehur të ish-kryeministrit Sali Berisha lidhur me çështjen “Partizani”.
E ftuar në emisionin “Kjo Javë”, Tabaku tha se një zhvillim i tillë do të ndikojë edhe në Partinë Demokratike.
Ajo është shprehur dhe ka uruar që një proces i tillë të përfundonte sa më shpejt, qoftë për të mirën e PD-së ashtu edhe për faktin se kemi hyrë në një vit elektoral.
Ndër të tjera deputetja është ndalur dhe te protesta e zhvilluar para SPAK nga mbështetës të PD-së ditën kur Berisha u paraqit në Prokurori, për të cilën tha se “kjo nuk përbën lajm, për shkak se ka më shumë se një vit që kudo ku ndodhet Berisha protestohet”.
Tabaku tha se ka kërkuar bashkimin e PD-së dhe nuk ka pasur asnjë dyshim që PD duhej të ishte bashkë.
Deputetja demokrate tha se e kishte me pak emocione rikthimin në mbledhjet e Grupit Parlamentar, referuar zhvillimeve të viteve të fundit.
“Bashkimi i PD po ndodh realisht, ne duhet të ecim përpara me ofertën elektorale dhe aksionin elektoral”, tha Tabaku.
Ndër të tjera, Jorida Tabaku tha se në Parlament nuk ka asnjë negociatë të fshehtë mes opozitës dhe mazhorancës, përfshi këtu edhe ndryshimet në Kodin Zgjedhor. Sipas saj, ndryshimet në Kod u miratuan referuar edhe vendimit të Gjykatës Kushtetuese, lidhur me votën e diasporës.
“Do të shikojmë sa do të materializohet tashmë vota e Diasporës, por në anën tjetër nuk është reflektuar mbi asnjë prej rekomandimeve të OSBE/ODIHR. Nevoja për ndryshime duhet të vazhdojë, pasi Kodi dhe nevojat që ne kemi për zgjedhjet duhet të vazhdojnë”, tha Tabaku.
Sa i përket situatës së PD-së për zgjedhjet e vitit 2025, Tabaku deklaroi se opozita duhet të ngrenë frymë. Ajo shtoi se kanë ndodhur shumë gjëra, përfshi edhe një copëzim të ofertës opozitare, ndërsa shtoi se duhet që të ketë një front opozitar.
“Ne kemi treguar se Qeverisja është shumë e keqe, por ne duhet të tregojmë se çfarë mund të bëjmë ndryshe. Në çdo palë zgjedhje, nga 2013 kemi pasur programet më të mira se sa Partia Socialiste. Por debat për programet nuk kemi pasur, pasi njëherë socialistët nxjerrin dajren, pastaj kërcinimin, dhe nuk kanë nxjerrë asnjë program.
Ne duhet të japim frymë, të rigjallërojmë PD-së, të kemi një derë të hapur për ata që mendojnë ndryshe, duhet t’i kthehemi masës së gjerë që janë në opozitë me qeverisjen. Unë kam bërë një betejë në Gjykatën Kushtetuese lidhur me taksën mbi profesionet e lira. Ata që më kanë kërkuar me ngulm për të vijuar këtë aleancën opozitë-qytetarë, kanë qenë pikërisht të majtët.” – deklaroi Tabaku.
Ajo u shpreh se PD ka mundur Ramiz Alinë dhe nuk i mungon asgjë të mundë Edi Ramën, por duhet të zgjohet pak, të ngrihet në këmbë dhe të ngrejë në këmbë të madh e të vogël, kundër mazhorancës.
“Jam optimiste sepse kam parë të funksionojë aleanca e opozitës me qytetarët”, tha Tabaku.
Lidhur me aleancën me Partinë e Lirisë, deputetja demokrate tha se ne kemi nevojë për cilindo që bën opozitë.
Duke komentuar çështjen e mandatit të Olta Xhaçkës, Tabaku tha se 3 herë Parlamenti ka marrë në mbrojtje duke mos zbatuar vendimet e Gjykatës Kushtetuese.
Deputetja theksoi se po krijohet një precedent i rrezikshëm lidhur me vendimet e Gjykatës Kushtetuese, duke kujtuar këtu 3 vendimet për Xhaçkën, atë për profesionet e lira, atë për Komisionet Hetimore, që nuk po zbatohen.
“Çfarë Shqipërie është kjo e 2024, kur nuk ka respekt për vendimet e Gjykatës Kushtetuese? Vendimi është i qartë: Kuvendi ka vetëm një detyrë, ta çojë në Kushtetuese”, tha Tabaku.
