Grupi parlamentar i Partisë Socialistë është mbledhur paraditen e së martës në selinë rozë.
Burimet mediatike bëjnë me dije se mbledhja ka zgjatur 30 minuta, ku janë diskutuar porositë e lëna nga kryeministri Edi Rama mbledhjen e djeshme dhe në Asamble.
Pas mbledhjes me kabinetin qeveritar ne Dajt, te premten Rama do te mbledh deputetet e PS në Elbasan.
Pikërisht, për komunikimin, në një intervistë për Top Channel, kreu i grupit parlamentar socialist Niko Peleshi deklaroi: “Komunikimi bëhet edhe më i rëndësishëm tani që po i afrohemi zgjedhjeve të vitit të ardhshëm. Na duhet të komunikojmë më shumë për ato që kemi bërë dhe natyrisht, përhapur ndonjë tymnajë nga opozita për të fituar debatin politik. Pra, komunikimi është shumë i rëndësishëm. Komunikimin, qeveria e realizon përmes kanaleve të veta, dhe Parlamenti ka rëndësinë e vetë. Tre janë kanalet ku unë e shoh deputetin në komunikimin publik, puna në seancë dhe komisione, si performon grupi parlamentar në seancë dhe komisione. E dyta, komunikimi përmes rrjeteve sociale, që po merr peshë të madhe në komunikimin publik. Dhe komunikimi në elektorat. Në këto tre aspekte, unë do të bëj punën time si kryetar i grupit parlamentar, për ta çuar në një nivel tjetër, për ta përmirësuar dhe për t’i dhënë një dorë përpjekjes së PS-së për të fituar zgjedhjet e ardhshme”.
Një ditë më parë, kryeministri Rama mblodhi në selinë rosë kryesinë e re të partisë. Kjo erdhi vetëm një ditë pas mbajtjes së Asamblesë Kombëtare të PS-së, ku dhe u prezantuan 12 drejtuesit e partisë në qarqet e vendit.
Asambleja e Partisë Socialiste pasohet nga Kongresi dhe thirrja e vazhdueshme e rienergjizimit të socialistëve, duke njoftuar dhe krijimin e një strukture të re për të rinjtë që angazhohen në politikë.
