Sot nis viti i ri shkollor parauniversitar.
Emocionet e nxënësve në ditën e parë të shkollës si duket do të varen nga përballimi i stresit nga prindërit që i shoqërojnë të vegjlit e tyre me automjete private.
Trafiku në shumë zona të Tiranës ka “paralizuar” lëvizjen e automjeteve ndërsa qytetarët duhet të presin me orë të tëra për të përshkruar me makinë distanca të shkurta.
Prej orës 07:00, pothuajse e gjithë “Unaza e Vogël” e kryeqytetit ka ngjyrë të kuqe në “Maps”, e përkthyer ndryshe në trafik të rënduar.
Gjithashtu segmente të tjera të bllokuara janë: Rruga e Kavajës, Bulevardi Zogu I, Rruga e Barrikadave, Unaza e Vogël, Rruga e Elbasanit, Astir, Yzberisht, rruga “Dritan Hoxha”, “Brryli”, të gjitha akset dhe nyjet krytesore të Tiranës janë të bllokuara.
Po ashtu edhe te sheshi ‘Shqiponja’ situata është kaotike. Katastrofë e cilësojnë drejtuesit e mjeteve situatën e trafikut teksa flasin për pritje të gjata.
“Katastrofë, përveçse kemi pritur shumë gjatë është një bllokim me blloqe atje komplet i palogjikshëm”, tha një prej shoferëve të bllokuar në trafik.
- Bie propaganda e Veliajt, betorinere dhe mjete të tonazhit të rëndë në qarkullim
Pavarësisht propagandës së Veliajt i cili deklaroi se nga ora 07-00 deri në 09:00 të mëngjesit nuk do të lejohen të qarkullojnë automjete të tonazhit të rëndë, furgonë, apo mjete të tjera transporti. E kundërta ndodh në terren ku që në “pikë të mëngjesit qarkullojnë betoniere, furgonë, mjete të tonazhit të rëndë ndodhen në trafik duke sjellë një situatë akoma edhe më kaotike.
Sigurisht këto automjete të rënda përdoren nga ndërtuesit e pallateve të cilët kanë “lejen” në xhep prej Erion Veliajt i cili vijon të betonizojë kryeqytetin. Siç mund ta shihni në foto dy automjete të tonazhit të rëndë ndodhen njëra pas tjetrës të cilat përdoren për të larguar dherat që dalin nga hapja e gropave të pallateve në ndërtim.
Trafik kilometrik raportohet edhe në periferi të Tiranës në zonat: Institut, Paskuqan, Kamëz dhe Kombinat ndërsa qytetarët kanë fikur automjetet e tyre në mes të rrugës duke kaluar nëj kalvar të gjatë vuajtjesh, pritje dhe stres.
Përgjegjës për situatën kaotike në Tiranë është vetëm kryebashkiaku socialist Erion Veliaj i cili e ka kthyer Tiranën në një kantier të madh ndërtimi, fluks makinash dhe ajër i ndotur. Fatkeqësisht, dita e një qytetari në Tiranë nis me stres e ankth, ku të gjithë vrapojnë për të arritur në orar në destinacionet e tyre, disa të tjerë duhet të dalin një orë para nga shtëpia për të kapur autobusin, pasi metropoli zhytet në kaos trafiku që në orët e para të mëngjesit.
Trafiku rëndohet edhe në orët e pasdites, kur qytetarët kthehen nga puna. Një dite të lodhshme, i shtohet edhe trafiku i rënduar vetëm sepse kryebashkiaku nuk tregon përgjegjshmëri ndaj qytetarëve të tij.
- Transportu publik në gjendje të mjerueshme
Më e vështirë lëvizja bëhet për ata që përdorin transportin urban. Përveç kohës së stërzgjatur të qëndrimit në trafik, detyrohen të shtypen si sardele në konserva për të arritur në kohë në destinacion.
E ndërsa Veliaj dhe institucionet shpenzojnë miliarda në tendera publikë, shpesh ngrihet pikëpyetja nëse është mënyra e përdorimit të taksave të qytetarëve po investohen në mënyrë efiçente në interes të tyre.
Apo më keq akoma, nëse po vidhen nga Veliaj në bashkëpunim me klientët e tij, duke anashkaluar problemet akute të një qyteti, që përveç trafikut të rënduar, do të përballet me siguri me përmbytje nga shirat e vjeshtës, dimrit, paraverës e verës tjetër nëse Erion Veliaj do të vijojë të jetë në krye të Bashkisë së Tiranës.
Vendimet e gabuara të bashkisë së Tiranës, që favorizojnë një numër të vogël biznesesh, bllokimi i rrugëve nga rrugët e biçikletave, ndryshimi i drejtimit për shumë rrugë të tjera, bllokimi i tyre dhe punimet e zgjatura nëpër rrugë, ka bërë që prej muajsh qyetarët të vuajnë.
Prej kohësh, trafiku në Tiranë rëndohet dhe askush as nga bashkia dhe as nga institucione të tjera nuk marrin masa për të lehtësuar këtë vuajtje të përditshme të qytetarëve.
- Në Tiranë rritet dendësia e popullsisë, mungon infrastruktura
Pas viteve ’90, kryeqyteti ka qenë një magnet për të tërhequr banorët që vinin nga rrethet.
Tirana dhe Durrësi janë të vetmet që kanë shënuar emigracion të brendshëm, ndërsa qytetet e tjera kanë parë një rënie të vazhdueshme të popullsisë, për shkak të rënies së emigracionit dhe të lindjeve.
Sipas Eurostat, në krahasim me vitin 2012, dendësia e Tiranës është rritur me 18%, ose me 84 banorë më shumë për një kilometër katror, por mungon infrastruktura. Me “bekimin” e kryebashkiakut Erion Veliajt, Tirana vetëm po betonizohet nga kullat shumëkatëshe kurse rrugët ngushtohen dhe në këtë mënyra lëvizja në kryeqytet bëhet kaotike.
