Një zjarr ka përfshirë vend-grumbullimin e mbetjeve urbane në Kukës, ndërsa vatra ka çliruar një shtëllungë të madhe tymi në ajër dhe tymi ka mbuluar zonat e banuara në qytetin verilindor.
Ndërsa dy mjete të shërbimit të zjarrëfikses së qytetit të Kukësit po luftonin për shuarjen e zjarrit, smogu ka përfshirë fshatrat dhe një pjesë të qytetit që janë në afërsi me pikën e grumbullimit.
Kjo pikë e mbetjeve është përfshirë disa herë nga zjarri brenda pak muajsh duke shkaktuar një ndotje masive tek banorët. Ajo është e pozicionuar në krahun perëndimor të qytetit dhe ka një largësi vetëm 1 km nga lagjet e Kukësit.
Bashkia Kukës vitet e fundit po vuan nga mbetjet urbane pasi vend-grumbullimi i Kolshit është i vetmi vend për mbetjet urbane si dhe është i tej mbushur.
Prej vitesh është kërkuar ndërtimi i një impianti të përpunimit të mbetjeve në fshatin Përbreg për të zgjidhur këtë problem.
