Koordinatori për Programin Ekonomik në PD, Dorjan Teliti, denoncon kontrastin në Shqipërinë e Rilindjes, një vend që shpopullohet dita ditës, ndërkohë që qeveria po i hap rrugën ligjit për importin e mbetjeve.
Sipas Telitit, hedhja për konsultim publik i ligjit për të lejuar importimin e mbetjeve, tregon edhe njëherë vizionin e mbrapshtë qeveritar për të kryer ‘punët e porositësve’ dhe jo punët për zgjedhësit
Më poshtë reagimi i Dorian Telitit:
SHQIPËRIA E RILINDJES: EKSPORTON SHQIPTARË, IMPORTON PLEHRA!
1 milionë shqiptarë janë larguar nga vendi këto vitet e fundit, ndaj nevojitet sa më shpejt të implementohen skema se si e si të rikthejmë shqiptarët në atdhe, por jo, përkundrazi, shkojnë e ndërmarrin iniciativa ligjore ‘të porositura’ që asnjë të mirë nuk sjellin, madje hapin rrugën për trafikim ndërkombëtar ilegal mbetjesh të rrezikshme për jetën e njeriut.
Hedhja për konsultim publik i ligjit për të lejuar importimin e mbetjeve, tregon edhe njëherë vizionin e mbrapshtë qeveritar për të kryer ‘punët e porositësve’ dhe jo punët për zgjedhësit, të cilët duan thjesht një Shqipëri të jetueshme e jo të jetojnë si në një vend të botës së tretë me pasiguri të lartë dhe korrupsion të kudogjendur.
Ndaj duhet ndryshimi, pasi vetëm me ndryshimin vjen edhe shpresa se ky vend mund të bëhet, #osotokurrë!
