Janë zbardhur detaje të reja nga ngjarja e regjistruar mbrëmjen e djeshme në fshatin Rrenxa të njësisë Bushat në Vaun e Dejës.
Burime pranë grupit hetimor bëjnë me dije se Policia e Shkodrës ka shpallur në në kërkim dy vëllezër me mbiemrin Prendi dhe një person tjetër si autor të dyshuar të ngjarjes, të tre banues në fshatin Rranxa.
Autoritetet kanë dyshime konkrete se mes palëve ka patur shkëmbim zjarri. Dyshohet se personat që ndodheshin në automjetin tip “Audi” i zi i blinduar me targa gjermane, po shkonin drejt vëllezërve Prendi për t’u konfliktuar.
Por, këta të fundit e kanë paraprirë situatën dhe i kishin zënë pritë. Mendohet se njëri prej vëllezërve ka qëlluar nga një motor me automatik kallashnikov në drejtim të mjetit të blinduar tip Audi ndërsa të tjerët kanë qenë në një mjet tip BMW që është sekuestruar nga policia.
Mjeti tip “BMW” është i dëmtuar edhe ai nga plumbat duke shtuar dyshimet se ka pasur shkëmbim zjarri.
Ende mbetet e paqartë se kush ndodhej në automjetin tip “Audi”, pasi pas ngjarjes, personat që ndodheshin në të e kanë braktuisur dhe dyshohet se janë larguar me një automjet tjetër, e cila ishte në mbështetje të tyre.
Policia ka ushtruar kontroll në banesën e vëllezërve Prendi në fshatin Rranxa por nuk i kanë gjetur aty dhe është bërë shpallja e tyre në kërkim. Në vendin e ngjarjes janë gjetur rreth 30 gëzhoja të armëve të ndryshme.
Policia ka mbledhur kamerat e sigurisë në zonën përreth duke bërë të mundur identifikimin e autorëve të dyshuar dhe sekuestrimin e automjetit tip BMW.
