Kombëtarja shqiptare U-15 ka barazuar me rezultatin 1-1 në ndeshjen e parë miqësore ndaj Maqedonisë së Veriut, sfidë që u luajt pasditen e kësaj të enjte në stadiumin “Gjorgji Kyçyku” në Pogradec.
Golin e vetëm për kuqezinjtë në këtë takim e shënoi sulmuesi, Mattia Xhemali.
Trajneri Armand Damo e nisi ndeshje ndaj Maqedonisë së Veriut me këtë formacion titullar: Marsid Hoxha, Eno Resuli, Joart Mile, Rian Neza, Denis Nikolli, Angelos Como, Erjon Vajushi, Alis Cela, Haxhi Rrena (C), Gentjan Sharka dhe Mattia Xhemali.
Shqipëria U-15 dominoi takimi që në startin e ndeshjes dhe krijoi disa raste të mira shënimi, por goli erdhi vetëm në të 34-ën me Mattia Xhemalin. Sulmuesi realizoi një gol shumë të bukur dhe pjesa e parë u mbyll 1-0 për kuqezinjtë.
Gjatë fraksionit të dytë, trajneri Armand Dama kreu disa zëvendësime në fushë, duke u dhënë mundësinë thuajse të gjithë lojtarëve të tregojnë cilësitë e tyre.
Maqedonia e Veriut gjeti rrugën e rrjetës në minutën e 80-të dhe vendosi baraspeshën. Pavarësisht pësimit të golit, Shqipëria nuk e uli ritmin dhe vetëm pas dy minutash fitoi një 11-metërsh, por gjuajtja e Rian Nezës u ndal nga portieri kundërshtar. Rezultati nuk ndryshoi deri në fund dhe miqësorja e parë u mbyll në barazim 1-1.
Takimi i dytë miqësor Shqipëri U15 – Maqedoni e Veriut U15, do të luhet të shtunën më 24 gusht në stadiumin “Skënderbeu” në Korçë, në ora 17:00.
