Janë zbardhur detaje të reja nga ngjarja e rëndë e regjistruar mbrëmjen e 6 Gushtit në një restorant të kryeqytetit, ku blogerja Klea Prenga u godit në fytyrë me shishe qelqi nga ish-banorja e BBV, Antonela Berisha dhe e motra Mariela Berisha, duke e lënë të plagosur me çarje nël fytyrë dhe kokë.
Pas ngjarjes, Policia e Tiranës i shpalli në kërkim dy motrat Berisha, por deri më tani ato vazhdojnë të jenë ende në arrati.
Burime për mediat bëjnë me dije se zyrtarisht, sipas TIMS, Antonela dhe Mariela Berisha nuk janë larguar jashtë vendit, pavarësisht thashethemeve se mund të fshiheshin në Dubai.
Gjithashtu, mësohet se janë sekuestruar dy automjete të përdorura prej tyre. Njërën makinë dy motrat e kanë pasur natën e ngjarjes dhe pas dhunimit barbar të 24-vjeçares kanë lëvizur nga restoranti drejt banesës së tyre te zona e Rrugës së Kavajës në Tiranë, dhe me makinën tjetër u larguan nga banesa në drejtim të paditur.
Makinat u identifikuan nga kamerat e sigurisë dhe u sekuestruan nga policia. Makinat kanë qenë në përdorim të personave të tjerë, miq të motrave.
Prokurori e Tiranës ka nxjerrë urdhër-arresti për akuzën e plagosjes së rëndë kryer në bashkëpunim.
Antonela Berisha duket e pashqetësuar si nga ngjarja e rëndë, por edhe nga fakti se është në kërkim nga Policia, pasi ajo vazhdon të reklamojë veshjet e butikut të saj në rrjetet sociale.
Dyshohet se shkaku i sherrit mes vajzave të ashtuquajtura “VIP-e”, ka qenë një ndërhyrje në çift. Pak kohë më parë, Mariela Berisha është ndarë nga partneri i saj, biznesmeni Mir Pepa, me të cilin ka edhe një djalë.
Ky i fundit dyshohet se kishte krijuar një romancë të re me blogeren Klea Prenga dhe ky dyshohet se ka qenë shkaku pse motrar Berisha e dhunuan atë brutalisht.
Ngjarjen ka qenë vetë Klea Prenga e cila e ka denoncuar përmes një postimi në rrjetet sociale, ku publikoi edhe pamjet e rënda të të çarave në fytyrë.
“Të martën, rreth orës 21:30, teksa isha duke ngrënë qetësisht në një restorant në Tiranë, u përballa me një sulm të papritur dhe të dhunshëm. Dikush më goditi nga pas dhe më theu një gotë në fytyrë ndërsa po haja. Dëmtimet janë të rënda dhe kam shpëtuar për një qime. Tronditja e asaj nate është e paimagjinueshme. Sulmi u krye nga Mariela Berisha dhe Antonela Berisha. As ato dhe askush tjetër nuk mund ta shkatërrojë fytyrën dhe imazhin tim. Më vjen keq për to, sepse e tyrja është e shkatërruar me kohë. Nga anët tona as hasmi nuk goditet duke ngrënë. Po të ishe aq gangstere sa të duket vetja, do më kishe ardhur përballë.
Sa për mesazhin kërcënues që ke dërguar pasi ke kryer sulmin. Mua nuk ma prishin dot imazhin fundërrina si ju qe ju njeh e gjithë Shqipëria. Ti nuk ke familje vajzë e dashur që të të hyhet në mes. Ti del e tregon përralla nëpër media për jetën tënde. Femra xheloze si puna juaj meritojnë të izolohen në një spital mendor, sepse as sulmet e juaja të dhunshme nuk do të mundin të më shkatërrojnë mua apo jetën time. Femra si puna juaj janë mësuar me jetën e rrugës dhe aq kapacitet keni sa të arrini në veprime të tilla jo njerëzore. Por mua nuk ma prishni dot identitetin dhe vlerat e mia, sepse vij nga një familje me vlera dhe integritet dhe asgjë nuk mund ta ndryshojë këtë.
Do jua çjerr maskën shumë shpejt. Regjistrimet e kamerave janë në dorën e shtetit dhe do të publikohen së shpejti. Jam mirënjohëse që jam ende këtu dhe se nuk përfundoi më keq. Policia po heton ngjarjen, dhe shpresoj që drejtësia të vihet në vend. Ky sulm nuk do të më ndalojë; përkundrazi, do të më bëjë më të fortë dhe më të vendosur”, shkruan Klea Prenga në postimin e saj.
