Një sherr i dhunshëm mes dy grupeve është regjistruar në një lokal në fshatin Trebisht të Bulqizës.
Autoreitetet policore raportojnë se shtetasit Azem Osmani, Pelikron Osmani, dhe H.O., janë konfliktuar fizikisht me shtetasit B.Z., E.D., P.D., dhe I .D., duke përdorur dhe sende të forta ndaj njëri-tjetrit.
Si pasojë e konfliktit kanë mbetur të plagosur shtetasit P.D., dhe I.D., të cilët janë dërguar me urgjencë në Qendrën Spitalore Universitare Tiranë.
Ndërkohë, Policia e Bulqizës arrestoi Azem Osmani, 32 vjeç dhe Pelikron Osmani, 45 vjeç, të cilët akuzohen për veprën penale “Plagosja e rëndë me dashje” kryer në bashkëpunim.
Gjithashtu janë proceduar penalisht në gjendje të lirë dhe shtetasit B.Z., H.O., E.D., P.D., dhe I.D., të cilët akuzohen për veprën penale “Plagosja e lehtë me dashje”, kryer në bashkëpunim.
Mësohet se në pyetje po merren personat e përfshirë në përleshje dhe dëshmitarë të tjerë në fshat, për të mësuar më shumë rreth motiveve dhe dinamikës së plagosjes e përleshjes. Policia raporton se sherri ka ndodhur pas një konflikti të çastit për motive të dobëta.
Materialet procedurale i kaluan Prokurorisë për veprime të mëtejshme.
