Policia e Tiranës ka arrestuar një person, i cili akuzohet se i ka vënë qëllimisht zjarrin tokës së kushëririt të tij.
Në pranga është vënë shtetasi N. M., 58 vjeç, i cili akuzohet për veprat penale “Shkatërrimi i pronës me zjarr” dhe “Prodhimi, mbajtja, blerja apo shitja pa leje e armëve të ftohta”.
Sipas bluve të kryeqyetit, ky shtetas dyshohet se, ditën e djeshme i ka vënë zjarrin një sipërfaqe toke me pemë dhe shkurre në pronësi të kushuririt të tij, në fshatin Prush. Gjatë kontrollit fizik uniformat blu i kanë gjetur 58-vjeçarit, një mjet prerës thikë dhe një çakmak.
Siç shihet edhe në videon e mëposhtme, ai është filmuar nga kamerat e sigurisë kur i vë zjarrin tokës së kushëririt të tij.
Policia e Tiranës apelon për të gjithë qytetarët, që në asnjë rast të mos shkaktojnë zjarrvënie, pasi do përballen me ligjin.
