Policia e Korçës ka publikuar pamjet e momentit kur efektivët e Pogradecit “mësyjnë” në banesën e 39-vjeçarit Spartak Çela në fshatin Buzaishtë të njësisë Velçan në zonën e Mokrës dhe kryejnë arrestimin e tij.
Siç shihet edhe në videon e mëposhtme, efektivët nuk i kanë dhënë mundësi 39-vjeçarit as të vishet, pasi ai del me pranga nga banesa pa bluzë dhe këmbëzbathur.
.
Çela ishte kthyer në një të shumë kërkuar të drejtësisë me rrezikshmëri të lartë shoqërore, pasi prej 4 vitesh ndodhej në arrati, pasi në vitin 2020 ka qëlluar me kallashnikov drejt disa personave në një lokal në Velçan të Mokrës dhe tentoi të vrasë shokun e tij, Bledi Shahinin.
Ngjarja ka ndodhur në gusht të atij viti, ku 39-vjeçari në ambientet e lokalit qëlloi me armë zjarri automatik mikun e tij, Bledi Shahini, i cili fatmirësisht si pasojë e plumbave mbeti vetëm i plagosur.
Spartak Çela doli sërish në skenë më 26 prill të vitit 2024 kur u zuri pritë dhe kërcënoi punonjësit e Task Forcës në fshatin Buzaishtë të Velçanit, të cilët ishin për verifikim në terren të personave që trajtohen me ndihmë ekonomike.
Sipas autoriteve policore, Gjykata e Shkallës së Parë ka vendosur masa “Arrest me burg” dy herë ndaj tij për veprat penale të “Vrasje me dashje e mbetur në tentativë”, “Vjedhje me armë ”, “Prodhimi, shitja dhe mbajtja pa leje e armëve, armëve shpërthyese dhe municioneve luftarake”, “Kundërshtimi i punonjësit të të policisë”.
Pasditen e sotme, pas disa informacioneve të marra në rrugë operative, Policia kishte mësuar se Spartak Çela pas 4 vitesh në arrati ishte kthyer në banesën e tij. Pas organizimit të aksionit të drejtuar nga vetë komisari Elton Halili, efektivët e policisë kanë rrethuar banesën dhe kanë bërë të mundur arrestimin e 39-vjeçarit.
Prej katër 4 vitesh, që nga ngjarja e parë kur ai qëlloi me armë drejt 5 personave në lokalin e fshatit, autori kishte mundur të fshihej ndaj policisë, në malsinë e Mokrës.
Materialet proceduriale do t’i kalojnë Prokurorisë pranë Gjykatës së Shkallës së Parë të Juridisksionit të Përgjithshëm Korçë për veprime të mëtejshme.
