Pas vrasjes së liderit Ismail Haniyeh në një sulm në Iran, media e Arabisë Saudite, Al Arabiya shkruan se Mohammad Ismail Darwish, do të jetë drejtuesi i ri i Hamas.
Darwish, i cili jeton në Katar, do të drejtojë Byronë Politike të Lëvizjes Palestineze deri në mbajtjen e zgjedhjeve të reja, shtuan burimet.
Hamasi tha në një deklaratë se lideri i saj Ismail Haniyeh u vra në rezidencën e tij në Teheran në një bastisje nga Izraeli, më 31 korrik.
Grupi palestinez që kontrollon Gazën tha se Haniyeh “u vra në një sulm të pabesë”. Grupi tha se ai kishte marrë pjesë në ceremoninë e inaugurimit të presidentit të ri iranian Masoud Pezeshkian të martën.
“Lëvizja e Rezistencës Islamike Hamas vajton për popullin tonë të madh palestinez, për kombin arab dhe islamik dhe për të gjithë njerëzit e lirë të botës”, thuhet në deklaratë.
Shumica e udhëheqësve të Hamasit mbajnë një profil të ulët publik, ndërsa të tjerë kanë kaluar pjesën më të madhe të jetës së tyre duke iu shmangur tentativave për vrasje nga Izraeli.
