Gjykata e Posaçme do të japë vlerësimin e masave të sigurisë ditën e sotme për 12 të arrestuarit në kuadër të operacionit “Plumbi i Artë 2”, teksa SPAK lëshoi 33 urdhër-arreste në total, ndërsa u ekzekutuan vetëm 13 prej tyre, ndërsa 2 tjerë rezultojnë të arrestuar jashtë vendit.
Ndërkohë gjyqi për ish-gjyqtaren e Gjykatës së Elbasanit, Pajtime Fetahu është zhvilluar e veçuar nga 11 personat e tjerë, teksa ndaj saj rëndon akuza për veprat penale “Veprime korruptive në ndihmesë të këtij grupi kriminal”.
Ajo ka mbërritur në GJKKO, rreth orës 09:30, teksa burime bëjnë me dije se ajo është përlotur në sallën e gjyqit, duke pretenduar se nuk ka lidhje me grupin e dy vëllezërve Franca dhe Hajdar Çopja.
“Për këto që më akuzoni nuk kam dijeni”, mësohet se është shprehur ish-gjyqtarja, e cila ka qarë para togave të zeza.
Ndaj saj, GJKKO ka lënë në fuqi masën e sigurisë “arrest në shtëpi”. Pas daljes nga seanca ish-gjyqtarja u shpreh se nuk ka asgjë për të thënë.
Ndërkohë, për sekretaren e ish-gjyqtares Pajtime Fetahu, Denada Toda, GJKKO ka lënë në në fuqi masën e ndalimit te daljes jashtë vendit.
Për këtë të fundit rëndon akuza për vperën penale “Zbulimi i akteve ose të dhënave sekrete”, kryer gjatë periudhës kohore shtator – tetor të vitit 2020, në Elbasan.
Denada Toda alias Runaj është motra e të ndjerit Regis Runaj, i cili në 29 korrik 2020 u masakrua me rreth 27 goditje thike, nga Euglen Halili, i cili kishtë marë urdhër nga Xhuljano Hoxha dhe Erjon Alibej për vrasjen e Runaj në qytetin e Elbasanit.
Denada Toda alias Runaj ka shërbyer për më shumë se 10 vite si sekretare gjyqësore në gjykatën e Tiranës dhe atë të Elbasanit, duke punuar si sekretare pranë gjyqtares Pajtime Fetahu. Por prej disa kohësh ajo është larguar me dorëheqje nga gjykata e Elbasanit, duke u vendosur në Itali.
