Kryeministri Edi Rama, teksa ndodhet me pushime në Dhërmi, përmes një postimi në rrjetet sociale ka sulmuar mediat dhe kritikët, për mungesën e turistëve në vendin tonë dhe dështimin në këtë sezon.
Rama i konsideroi të gjithë kritikët që mendojnë se në Shqipëri nuk ka turiste si një sy i keq: “Tamam si ato hudhrat që e mbrojnë vendin nga syri i keq”.
Kreu i qeverisë thotë se nga aeroporti i Rinasit kanë hyrë pothuajse 1 milionë e 200 mijë pasagjerë, mbi 350 mijë më shumë se vjet, por nuk dha snjë të dhënë për hotelet dhe shtëpitë e pushimit në vend.
“Mbrëmë mora të dhënat e hyrjeve në Shqipëri nga aeroporti Nënë Tereza dhe nga hyrjet në Morinë. Nga aeroporti kanë hyrë pothuajse 1 milionë e 200 mijë pasagjerë, mbi 350 mijë më shumë se vjet. Madje këtë korrik është thyer edhe një rekord tjetër, ai i hyrjeve në një ditë të vetme, 44 mijë. Aeroporti ka arritur të operoje deri në 252 fluturime në ciklin e 24 orëve, një volum marramendëse dhe i paimagjinueshëm deri para ca vitesh.
Për shifrat e aeroportit nuk mund të thonë dot gjë as ato gojët me qime që nuk pushojnë u zbraz Shqipëria edhe nga shqiptarët edhe nga turistët.
Aeroporti i Tiranës po mbush vitin në krye të klasifikimit evropian për rritjen relative me vitet paraardhëse. Tirana e ka spastruar në vendin e dytë aeroportin e Beogradit, i cili ka qenë i pari në rajon”, tha ai.
Sa i takon braktisjes nga shqiptarët e Kosovës, Rama sërish nxori shifrat e doganës së Morinës, ku tha se kjo është një teori dashakeqëse.
“Edhe shifrat e hyrjeve në Morinë, që i tregon regjistri elektronik i pagesës së autostradës ku mund të lexohet cdo hyrje, tregojnë se gjatë këtij viti kanë hyrë 175 mijë makina më shumë se vjet, ndërsa në korrik, 3 mijë më shumë se vjet.
Pra edhe ajo teoria keqdashëse e përhapur në këtë sezon se shqiptarët e Kosovës e kanë braktisur Shqipërinë është një zero më xhufka”, tha Rama.
