Kryeministri Edi Rama ka bërë ndryshime në Qeveri dhe në Kuvend, të cilat i ka propozuar në fund të fjalimit të tij në Kongresin e Partisë Socialiste.
Rama propozoi emërimin e Elisa Spiropalit për të zëvendësuar Lindita Nikollën në postin e kryetares së Kuvendit, pasi kjo e fundit dha dorëheqjen tre ditë më parë, sipas saj, për arsye shëndetësore.
Ndërkohë, Rama ka larguar edhe Ermonela Felajn nga posti i nënkryetares së Kuvendit, dhe në vend të saj ka emëruar Bledar Çuçin, i cili mbante postin e kreut të grupit parlamentar të PS-së.
Në vend të Çuçit, në postin e kreut të grupit parlamentar të PS-së ka emëruar Niko Peleshin, duke e larguar nga posti i Ministrit të Mbrojtjes.
Gjithashtu, një ndryshim surprizë në qeveri ishte dhe ai i Taulant Ballës. Ky i fundit është larguar posti i Ministrit të Brendshëm, duke e emëruar në postin e ministrit të Shtetit për Marrëdhëniet me Parlamentin, në vend të Elisa Spiropalit.
Gjithashtu, Rama ka larguar edhe Ervin Meten nga posti i ministrit të Financave, duke emëruar në vend të tij Petrit Malajn. Ndërkohë, Ervin Hoxha është emëruar ministër i Brendshëm, ndërsa Pirro Vengu është emëruar ministër i Mbrojtjes.
Ervin Hoxha më herët ka mbajtur postin e drejtorit të Inspektoriatit Kombëtar të Mbrojtjes së Territorit dhe drejtor i Përgjithshëm i Shërbimit të Provës, ndërsa Pirro Vengu ka mbajtur postin e kreut të Autoritet Portual.
Ndryshimet në Qeveri ishin të pritshme nga veprimi i Presidentit të Republikës, Bajram Begaj, i cili mëngjesin e sotëm shkoi në Presidencë edhe pse e diela është një ditë pushimi për të.
Socialistët do të propozojnë tashmë një seancë të posaçme plenare javën e ardhshme për të miratuar ndryshimet në Qeveri dhe në Kuvend.
“Dua ti propozoj grupit parlamentar që në një seancë të menjëhershme t’i japin mbështetjen që Elisa Spiropali të marrë drejtimin e Parlamentit. Po ashtu, propozoj që Bledi Çuçi të marrë drejtimin e nënkrytarit të Parlamentit dhe Niko Peleshi kreun e grupit parlamntar të PS-së.
Sot menjëherë pas mbledhjes së Kuvendit do i çoj Presidentit propoziomet për ndryshimet në qeveri. Balla ministër për Marrëdhëniet me Parlamentin, ministër i Brendshëm, Ervin Hoxha, i Financave, Petrit Malaj dhe i Mbrojtjes Pirro Vëngu.” – tha Rama.
LEXO EDHE:
Kush janë ministrat e rinj të Ramës, të tre drejtorë të Belinda Ballukut
