Analisti Enton Abilekaj ka deklaruar se dakordësia mes palëve sot për reformën zgjedhore, i hap rrugë të fortëve të futen në kuvend.
I ftuar në Ora News, theksoi se zgjedhjet blihen dhe paracaktohen nga mazhoranca dhe se nuk rregullohen zgjedhjet me Kod Zgjedhor në vend, sepse nuk respektohet.
“Kjo është një kauzë e disa partive, jo vetëm e PD-së, që nuk e njohim mirë Kodin Zgjedhor, mendonin dhe propozuan që të shëronin listat nga kryetarët dhe menduan që të hapen listat. Hapja e listave është kthimi i mazhoritarit dhe një model më i keq se ai origjinal, sepse mund të bëhet në gjithë vendin. Kjo do të thotë se një i fortë dhe një biznesmen për tu futur në procesin zgjedhor, e ka shumë më të lehtë.
Mendoj se kjo që është arritur ka një përfitim vetëm për ata që mendojnë se listat e hapura ndikojnë, edhe pse mendoj se nuk ndikojnë te dekryetarizimi i partive. Kjo është një reformë kot dhe pa asnjë vlerë, që i jep opozitës diçka që nuk i duhet. Zgjedhjet blihen dhe paracaktohen nga mazhoranca. Nuk rregullohen zgjedhjet me Kod Zgjedhor në vend, sepse nuk respektohet”, tha Abilekaj.
