Një sherr mes dy shqiptarëve është regjistruar në ishullin Kos të Greqisë. Ngjarja ka ndodhur në zonën e rrugës “Porphyriou” e cila është e mbushur plot me biznese dhe restorante turistike.
Mediat vendase raportojnë se shkaku i sherrrit mes shqiptarëve ka qenë se ata kanë “pretenduar” të njëjtët klientë për në restorante
Më konkretisht, menaxheri i një restoranti ka tentuar të “bindë” turistët kalimtarë të vizitojnë lokalin ku ai punonte, gjë që shkaktoi shpërthimin e pronarit të një biznesi fqinj.
Dy burrat u konfliktuan, teksa menaxheri 31-vjeçar me origjinë shqiptare i një lokali, arriti të rrahë brutalisht kolegun e tij bashkatdhetar. Sipas informacioneve të mediave greke, 31-vjeçari ka qenë sportist i arteve marciale në të kaluarën.
Rezultat i sherrit ishte plagosja e rëndë e pronarit të biznesit tjetër, i cili fillimisht u dërgua në Spitalin e Përgjithshëm të Kos për t’iu dhënë ndihma e parë pasi kishte lëndime në kokë. Më pas të plagosurit iu rivlerësua gjendja dhe u dërgua në spitalin e Rodos ku po trajtohet në repartin e kujdesit intensiv me dëmtime të rënda në tru.
31-vjeçari shqiptar është arrestuar nga Policia dhe ndodhet në paraburgim, si dhe dy bashkatdhetarë të tjerë që kanë marrë pjesë në sherr.
