Kolegji i Gjykatës së Lartë ka rrëzuar këtë të martë ankimin e paraqitur nga avokatët e kreut të Partisë Demokratike, Sali Berisha dhe dhëndrit të tij, Jamarbër Malltezit për revokimin dhe zëvendësimin e masës së sigurisë, në lidhje me hetimet për dosjen Partizani.
Vendimi është marrë nga trupa gjykuese e përbërë nga gjyqtarët Sandër Simoni, Ilir Panda dhe Sokol Binaj. Mëherët, avokatët e Berishës dhe Malltezit kishin kërkuar përjashtimin e kësaj trupe gjykuese nga shqyrtimi i kësaj çështje, por edhe kjo kërkesë prej tyre u rrëzua.
Berisha dhe Malltezi mbahen prej muajsh nën masën e sigurisë “Arrest në shtëpi” në lidhje me hetimet për privatizimin e ish-kompleksit sportiv “Partizani”. Ata e kanë konsideruar arrestimin si politik, pasi pretendojnë se ndaj tyre nuk ka asnjë provë.
Berisha akuzohet nga SPAK për kryerjen e veprës penale “Korrupsioni pasiv i funksionarëve të larte shteterore ose te zgjedhurve vendore, kryer në bashkëpunim.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”.
Ndërsa, për Jamarbër Malltezin dhe ndërtuesin Fatmir Bektashi, SPAK-u deklaron se ata kanë përfituar shuma të mëdha financiare nga tjetërsimi i truallit në ndërtime të larta.
