Pas disa orësh diskutimesh, Komisioni i Drejtorisë së Burgjeve ka miratuar lejen e Fredi Belerit për të ikur drejt Strasburgut, ku do të marrë pjesë në mbledhjen e parë të Parlamentit Europian për t’u betuar si eurodeputet.
Komisioni i Drejtorisë së Burgjeve u mblodh paradite dhe u mblodh sërish edhe pasdite, ku pas disa orësh diskutime, ka vendosur t’ia miratojë lejen.
Burime për mediat bëjnë me dije se leja për Fredi Belerin do të jetë 5 ditore, teksa ai do të betohet si deputet i Parlamentit Europian më 15 Korrik.
Vlen të theksohet fakti se leja për Fredi Belerin është raportuar që para dy ditësh nga mediat greke, teksa “Burgjet” reaguan duke e mohuar se kishte një vendimarrje mbi kërkesën.
Fredi Beleri u zgjodh në postin e deputetit të Parlamentitn Europian nga partia “Demokracia e Re” e kryeministrit grek Kyriakos Mitsotakis. Ai arriti të merrte 237 mijë vota, duke qenë eurodeputeti i katërt më i votuar në shtetin helen.
Në kohën kur u zhvilluan zgjedhjet, ai ndodhej në burg, i arrestuar që më datë 12 maj 2023, dy ditë para zgjedhjeve lokale, teksa kandidonte për kreun e Bashkisë së Himarës. Ai u dënua me dy vite burg nga Gjykata e Posaçme e Apelit, duke e shpallur fajtor për krime zgjedhore, teksa mandati i tij i fituar u shpall i pavlefshëm nga Komisioni Qëndror i Zgjedhjeve.
Gjatë çdo seance, Fredi Beleri e ka konsideruar arrestimin dhe dënimin e tij si politik, teksa ka akuzuar Prokurorinë se ka sajuar faktet dhe provat kundër tij.
Beleri akuzon për kapjen e shtetit të çdo institucion, teksa sipas Belerit, edhe KQZ e mori vendimin kundër pa bazë ligjore, teksa e ka ankimuar në KAS.
Burgosja e Belerit u parapri nga sulme të forta nga kryeministri Rama në fushatë, ku ai paralajmëroi se do të merrej personalisht me kandidatin e PBDNJ-së në Himarë. Për të çuar para porosinë e Ramës u angazhuan forcat operacionale të policisë, prokuroria dhe gjykata e Vlorës dhe më vonë SPAK dhe GJKKO që e mbajtën në burg kandidatin e opozitës, edhe pse i infiltruari pranoi se ishte paguar nga policia për të përgjuar Belerin.
Arrestimi i Fredi Belerit shkaktoi tensione të ashpra mes Athinës dhe Tiranës, ku Greqia e ka konsideruar si një arrestim politik, po ashtu edhe si opozita në vendin tonë. Fredi Beleri u bë i vetmi kandidat në Shqipëri që zgjidhej në një post publik ndërsa ishte në qeli.
