Teksa na ndajnë më pak se 24 orë nga protesta 11 korrikut, Flamur Noka, Gazment Bardhi dhe Albana Vokshi, kanë zhvilluar takime me banorët e Laprakës në Tiranë, ku i kanë ftuar të marrin pjesë tubimin e nesërm.
Teksa shpërndanin fletpalosje, Noka u bëri thirrje qytetarëve t’i bashkohen protestës së datës 11 Korrik, ora 20:00 kundër regjimit kriminal dhe anti-europian të Edi Ramës.
“Kjo protestë është për çdo familje, çdo biznes, çdo qytetar, që është prekur ekonomikisht nga regimi autokrat i Ramës. Kjo qeveri ka synim të vetëm të pasurojë veten, teksa qytetarët preken ekonomikisht dita ditës, ndërsa bizneset ulin qepenat për shkak të taksave të larta,” u shpreh Noka teksa shpërndante fletpalosje në zonën e Laprakës.
Noka gjithashtu i bëri thirrje çdo demokrati, që kërkon largimin e kësaj qeverie të korruptuar, të marrë pjesë në protestën e opozitës së bashkuar më 11 korrik, në një betejë pa kthim, deri në formimin e një qeverie teknike dhe vendosjen para drejtësisë të hajdutëve më të mëdhenj që ka njohur ndonjëherë historia.
