Liderët botërorë të cilët janë mbledhur në Washingon në kuadër të samitit të NATO-s me rastin e 75 vjetorit të themelimit të Aleancës kanë realizuar foton familjare, e cila është traditë pothuajse në çdo takim.
Mes tyre është dhe kryeministri shqiptar, Edi Rama, i cili shihet përkrah presidentit të ShBA-ve, Joe Biden. Samiti treditor i NATO-s do të mbahet nga data 9 Korrik deri më 11 Korrik.
Ky samit synon të projektojë forcën dhe të mbështesë Ukrainën në mbrojtjen e saj kundër pushtimit rus.
Takimi i NATO-s vjen në një moment prove për presidencën amerikane të demokratit Biden. Disa demokratë të Dhomës së Përfaqësuesve i kanë bërë thirrje publikisht që të heqë dorë nga fushata për Shtëpinë e Bardhë. Ligjvënës të tjerë, në biseda private, i kanë kërkuar zotit Biden që të tërhiqet ndërsa donatorë të profilit të lartë kanë ngritur shqetësime lidhur me aftësitë e tij në garën kundër republikanit Donald Trump.
Presidenti Joe Biden do të përballet me biseda të rëndësishme dhe të vështira lidhur me sigurinë globale gjatë takimit të NATO-s në kryeqytetin amerikan.
