Me ose pa parti të re mes demokratëve, opozita nuk ka shanse që t’i fitojë zgjedhjet parlamentare që pritet të mbahen pranverën që vjen. I këtij mendimi është analisti Andi Bushati, i cili i ftuar në A2 CNN pasditen e kësaj të marte, shpjegoi edhe dy arsyet.
Së pari, sipas Bushatit, ndër vite është treguar tashmë se me Edi Ramën kryeministër, nuk mund të flasim për zgjedhje por për votime. Dhe, së dyti, siç u shpreh ai, gabimi i opozitës qëndron në faktin se po kërkon t’i mbajë qytetarët me gënjeshtra kur në fakt mund t’u transmetonte realitetin.
“Kanë një lloj mentaliteti se shqiptarëve duhet t’u japësh shpresa të rreme për t’i mbajtur pranë vetes…Kur duhet të thonë: Opozita në Shqipëri është në kushte mbijetese, na ndihmoni…Në këto kushte, je më afër njerëzve.”
Ndërsa, duke u ndalur te zgjedhjet që pritet të mbahen në Himarë më 4 gusht, Bushati thotë se opozita në vend që të dilte me një kandidat, në fakt duhej të bojkotonte.
“Nuk do të kishte sens që opozita të hynte në këto zgjedhje pasi janë të falsifikuara kokë e këmbë. 4 gushti është thjesht prova gjenerale për zgjedhjet që do të pasojnë në 2025. Sepse Rama tentoi të manipulojë gjithçka, duke përdorur, policinë, SPAK-un, GJKKO-në dhe në fund presidentin e republikës,” shton analisti.
Sipas tij, asnjë kandidat i opozitës nuk ka shanse përballë kandidatit të PS-së, pasi në rastin konkret “nuk po garon me një parti rivale, por më të gjithë shtetin.”
Duke marrë pjesë në zgjedhjet e Himarës, sipas analizës së Bushatit, opozita po i tregon kreut të qeverisë se në “zgjedhjet e ardhshme manipulimi mund të vijojë.”
“Këta i japin garanci Ramës, që në zgjedhjet e ardhshme, na i bëj të gjitha këto, e dimë rezultatin, por prapë ne do të shkojmë si cjapi te kasapi.”
