Kryeministri Edi Rama është nisur ditën e sotme drejt Shteteve të Bashkuara të Amerikës për të marrë pjesë në samitin e NATO-s, teksa kjo vizitë është komentuar nga kreu i PD-së, Sali Berisha gjatë fjalës së mbajtur në tubimin e sotëm.
Berisha tha se cilindo që të takojë Rama, kreun e qeverisë e pret edhe një ballafaqim me “McGonigal-in” e tij, duke iu referuar akuzave për korrupsionin me ish-zyrtarin e FBI-së. Lideri demokrat tha se Amerika nuk është vetëm e Sorosit dhe mafies së tij, por është dhe e ligjit dhe e vlerave.
“Çfarë mund të bëjë më tepër ky se sa të korruptojë shefin e kundërzbulimit të FBI për Nju Jorkun dhe sot i pafytyri niset për në Nju Jork, për në Uashington për të marrë pjesë në samitin e NATO-s. Ai ulet aty si kryeministri i damkosur për korrupsion. Si njeriu që i ka korruptuar njërit nga njerëzit më të besuar në SHBA. Cilindo që të takojë, ju garantoj se një takim dhe ballafaqim e pret edhe me McGonigalin e tij. Po, po! Nuk është Amerika vetëm e Xhorxh Sorosit dhe mafies së tij. Amerika është e ligjit dhe e vlerave dhe Amerika nuk mund të mposhtet kurrë nga një mafie e pashpirt që bëhet parzmore e njeriut që i rekrutoi, i korruptoi një nga personat më kryesorë për mbrojtjen e saj.” – tha Berisha.
