Prokuroria e Lezhës ka bërë rekurs në Gjykatën e Lartë për Jeton Lamin, ish-agjenti i Forcës së Posaçme Operacionale dhe njëherësh shoqëruesin e të shumëkërkuarit të drejtësisë Ervis Martinaj
Prokuroria nuk ka pranuar vendimin për dënimin me 2 vite e 10 muaj burg për Jeton Lamin dhe ka bërë rekurs duke kërkuar rëndimin e dëpnimit ndaj tij.
Jeton Lami shoqëronte Ervis Martinaj gjatë kohës që ishte në detyrë si agjent i Operacionales, duke bërë që i shumëkërkuari i drejtësisë t’i shmangej armiqve dhe kontrolleve që bëheshin për lokalizimin e tij.
Çështja është hedhur në short dhe do të gjykohet nga anëtari i Gjykatës së Lartë, Ilir Panda.Ai është shpallur fajor pasi u akuzua se kishte shpërdoruar detyrën, sepse në vend që t’i hidhte prangat Ervis Martinaj, ishte bërë shofer dhe truproja e tij.
Në fakt, edhe vetë Jeton Lami ka bërë rekurs në Gjykatën e Lartë dhe kërkon pafajësi për këtë vepër penale. Ai pretendon se nuk ishte në dijeni që Ervis Martinaj ishte i shpallur në kërkim ndërkombëtar me urdhër të Prokurorisë së Posaçme, pasi faktin e dinin vetëm eprorët por jo ai dhe agjentët e tjerë të Forcës Operacionale.
Nga hetimet e deritanishme, Jeton Lami rezulton se është personi i fundit që ka parë Ervis Martinaj, pasi e ka marrë me makinën Audi A8 dhe e ka dërguar në një hotel në Durrës, bashkë me të dashurën e tij. Pamjet e kamerave të sigurisë të datës 7 Gusht 2022 dhe të dytëve më pas, 9 Gusht janë të vetmet ku shfaqet personazhi i cilësuar si “mbreti i kumarit”.
