Skandali tek spitali Onkologjik, ku mjekët kishin krijuar një skemë abuzive të transfermit të pacientëve me kancer drejt klinikave private ka shkaktuar pakënaqësi të madhe në publik duke nxitur dhe një protestë.
Thirrjet janë bërë përmes rrjetit, teksa protesta është planifikuar të mbahet pasditen e nesërme, në orën 19:00 para godinës së Ministrisë së Shëndetësisë tek “Rruga e Kavajës”.
Protesta do të mbahet nën moton “Viktima e radhës mund të jesh ti!”, teksa bëhet thirrje për pjesëmarrje masive për të reaguar pas këtij skandali.
Nga hetimi i kryer nga Prokuroria, ka rezultuar se pacientëve të diagnostikuar me tumor nuk u jepej trajtimi i duhur mjekësor dhe më pas drejtoheshin në klinika private. Po ashtu, janë konstatuar raste të blerjes së ilaçeve me vlera të konsiderueshme për kimioterapi, nga farmaci të cilat këto medikamente i tregtonin pa pullën fiskale dhe me kod të prishur, duke krijuar dyshimin në lidhje me autenticitetin e këtyre barnave.
