Deputetja e PD-së Dhurata Çupi Tyli ka ngritur nga foltorja e Kuvendit shqetësimin për kushtet në të cilat punojnë minatorët në Qarkun e Dibrës.
Ajo ka kërkuar që të marrjen e masave të menjëhershme për mbrojtjen e minatorëve, pasi vetëm muajin e fundit kanë humbur jetën 6 minatorë.
“Ka shumë minatorë punojnë pa kushte, pa minimumin e garancisë, janë rreth 7000 minatorë ku drama e tyre përsëritet çdo ditë: që luten çdo ditë të kthehen te fëmijët e tyre, nuk ka siguri në punë, nuk ka kontroll të sigurisë, as ndonjë raport, as kur ndodhin këto tragjedi, nuk kemi një raport të inspektoriateve të punës, cilat kanë qenë arsyet që humbën jetën këta minatorë. Nuk ka transparencë, cilat janë kompanitë që i kanë licensat. Nuk ka asnjë informacion sa licensa janë dhënë, kush i ka marrë si shfrytëzohen, asnjë ministër nuk përgjigjet për këto çështje. Çfarë duhet të bëhet? Në mënyrë të menjëhershme duhet të forcojmë ligjin, investime urgjente në këto miniera, minimalisht të respektojnë kushtet e kontratës”, tha Çupi, ku sipas saj, babëzia e Qeverisë po i vret minatorët.
Pas fjalimit të mbajtur në Kuvend, deputetja demokrate ka reaguar edhe në rrjetet sociale, ku shkruan se duhet mbështetje edhe për familjarët e viktimave.
“Jetesa e minatorëve në vazhdimësi është histori e dhimbshme. Vetëm muajin e fundit u aksidentuan 6 minatorë nga të cilët 2 të vdekur. E kjo situatë përsëritet me punëtorët në çdo sektor. Dhimbje e madhe . Askush nuk përgjigjet, askush nuk inspekton sigurinë në punë, askush nuk jep llogari.
Në një qytet me pasuri minerale dhe me varfëri ekstreme ndodhin drama vazhdimisht. Ata ikin në mëngjes me lutjen dhe shpresën që në darkë do të kthehen në familjet e tyre të gjallë.
S’ka siguri në pune po s’ka edhe kontrolle për sigurinë nga shteti. S’ka transparencë mbi dhënien e licencave. S’ka informacion mbi kapacitetet e këtyre subjekteve që marrin liçenca shfrytëzimi me të vetmen meritë, miq e dashamir të Partise Socialiste.
Kërkohet:
Forcimi i ligjeve.
Investime urgjent.
Mbështetje për familjet e viktimave.
Rritje e pagave dhe përmirësimi i kushteve të jetesës.
Statusin e minatorëve”, – shkruan Çupi.
