Qeveria Rama, në çdo raport rezulton si më e korruptuara në Europë, teksa çdo javë pothuajse plasin skandale me abuzime me shifra miliona euro, por një prej faktorëve që qëndron ende në pushtet ka propagandën.
Në shkelje të ligjit, Qeveria ngriti sistemin “akt1visti” si dhe sistemin e patrinazhistit për të monitoruar të gjithë punonjësit e administratës, mësues, mjekë dhe në çfarë do pozicioni pune, se kush bënte “like, share apo koment” të profileve të eprorëve të tyre në rrjetet sociale, si dhe të kryeministrit Edi Rama.
Së fundmi, ka qenë ministrja e Bujqësisë dhe Zhvillimit Rural, Anila Denaj e cila u ka dhënë urdhër punonjësve që t’i bëjnë “like dhe share” profilit të saj dhe të ministrisë në rrjetet sociale.
Mesazhi është përcjellë përmes drejtorëve pas një mbledhje në ministri, teksa skandali është publikuar nga kreu i Urdhrit të Mjekut Veterinar, Ervin Resuli, i cili e ka publikuar mesazhin me “screenshot”, duke e konsideruar si “turp”.
Në mesazh theksohet se punonjësit do të jenë nën monitorim nga ministria, teksa Resuli bën thirrje që ta refuzojnë këtë urdhër. Ai iu drejtohet kolegëve se duhet të jenë krenarë dhe të mbajnë dinjitetin për t’ju bërë ballë kërkesave absurde dhe të pajustifikueshme që kërkojnë “anadollakët”.
Postimi i plotë:
REFUZONI MESAZHET E TURPIT
Për kolegët e nderuar veterinerë,
Disa nga ju kanë shprehur shqetësime të drejta lidhur me detyra që nuk lidhen me profesionin fisnik të Mjekut Veterinar. Çdo përpjekje për t’ju detyruar të kryeni punë që nuk kanë lidhje me funksionin tuaj primar si Mjek Veterinar është abuzim mbi ju. Detyrimi për të hapur profile në Facebook, Instagram apo rrjete të tjera sociale, ose urdhrat për të bërë “like” dhe “share” lajme të ministrave, drejtorëve apo të tjerëve, bien ndesh me parimet e betimit tonë profesional.
Ne nuk jemi përfaqësues të partive dhe nuk kemi për qëllim t’i shërbejmë apo të mbështesim ministrat apo drejtorët me anë të aktiviteteve tona në rrjetet sociale. Profesioni ynë është i qartë në objektivat për përmbushjen e ligjit: “Mjeku human shpëton njeriun, mjeku veterinar shpëton njerëzimin”. Çdo përpjekje për të shkelur betimin dhe kodin e etikës të Mjekut Veterinar meriton përçmim dhe përbuzje.
Të nderuar kolegë, duhet të jeni krenarë dhe të mbani dinjitetin për t’ju bërë ballë kërkesave absurde dhe të pajustifikueshme që kërkojnë “anadollakët”. Ne jemi Mjekë Veterinarë dhe dinjitetin tonë e mbrojmë vetë. Ju nxis të raportoni çdo rast abuzimi pranë Urdhrit të Mjekut Veterinar për të çuar në vend dinjitetin e profesionit tonë.
Me respekt,
Ervin RESULI
Urdhri Mjekut Veterinar
