Besart Qerimi është 22 vjeç, por fiziku i tij i ngjan një fëmije 12-vjeçar. Që në moshën 5-vjeçare, ai u diagnostikua me hemofili, një çrregullim i rëndë i mpiksjes së gjakut, që kërkon trajtim të vazhdueshëm dhe rigoroz.
Familja Qerimi u zhvendos nga Kukësi në Tiranë më shumë se dy dekada më parë, por jeta i përplasi me sfida shëndetësore: dy nga tre fëmijët e familjes janë mbartës të hemofilisë.
Edhe djali tjetër i familjes vuan nga e njëjta sëmundje i është mbivendosur edhe problemeve në shëndetin mendor.
“Më ishte diagnostikuar djali i vogël dhe pesë vite më pas Besarti u vra dhe nuk i ndalohej gjaku”, u shpreh Flutura Qerimi, nëna
Hemofilia karakterizohet nga mungesa e faktorit VIII ose IX të koagulimit. Zyrtarisht, këta faktorë ofrohen falas nga shteti shqiptar. Në praktikë, pacientët përballen prej vitesh me mungesa të vazhdueshme të medikamenteve.
Nëse faktori zëvendësues nuk merret në kohë dhe në dozën e duhur, pacientët rrezikojnë gjakderdhje të brendshme, hematoma të rënda dhe invalidizim të përhershëm.
Për Besartin, i cili vuan nga mungesa e faktorit VIII, sigurimi i medikamentit mbetet një betejë e përditshme. Ndryshe nga receta e përshkruar nga mjeku, në farmaci ai merr shpesh vetëm gjysmën e dozës, për shkak të mungesave.
“Asnjëherë nuk e marr aq sa ma shkruajnë në recetë”, u shpreh Besart Qermi, pacient me hemofili
Pasojat tashmë janë të dukshme. Trupi i tij ka nisur të dëmtohet rëndë.
“Ja si më është bërë dora, ja edhe këmba… nuk eci dot”, u shpreh Besart Qermi, pacient me hemofili
Por, problemet nuk mbarojnë këtu. Gjatë trajtimit në spital, Besarti është infektuar edhe me hepatit C. Edhe pse diagnoza është konfirmuar dhe mjekët kanë rekomanduar trajtim, prej vitesh ai nuk është futur në skemë mjekimi.
“Jam me hepatit C. Asnjë mjekim, asgjë”, u shpreh Besart Qermi, pacient me hemofili
Pacientët me hemofili trajtohen në mungesë të një protokolli të miratuar mjekësor. Pas një ankese, Komisioneri për Mbrojtjen nga dikriminimi konstatoi se pacientët në këtë spital diskriminohen, duke mos u ofruar trajtimi i duhur. Institucioni nuk vuri në dispozicion protokollet e trajtimit.
Situata nuk është e izoluar. Institucione si Avokati i Popullit, Kontrolli i Lartë i Shtetit dhe Komisioneri për Mbrojtjen nga Diskriminimi kanë evidentuar shkelje serioze në sistemin shëndetësor, ku qytetarëve nuk u ofrohen shërbimet që vetë shteti ka marrë përsipër.
‘Nëse kemi 100 të sëmurë, sidomos sëmundjet kronike, nuk mund të kemi trajtim për 20 vetë. Kur sëmundjet shtohen ne duhet ti mbështesim njerëzit, por kjo mbështetje duhet të jetë për të gjithë. nuk mund të ketë dallime për një pjesë ka dhe për një pjesë jo. nuk mund ta luajë mjeku rolin e zotit dhe kjo nuk është përgjegjësi e mjekut por është përgjegjësi në shkallë ministrie’ u shpreh Ilir Alimehmeti, Zv/dekan, fakulteti i Mjekësisë
Një auditim i Kontrollit të Lartë të Shtetit zbuloi se për periudhën janar 2021 – mars 2025, nga 253 barna antitumorale të autorizuara për tregtim në Shqipëri, 116 prej tyre, ose 46%, nuk janë importuar asnjëherë. Një realitet dramatik për pacientët me kancer.
Raporti evidenton gjithashtu se, për shkak të mungesës së barnave, të miturit dërgohen për kurim jashtë vendit ose familjarët detyrohen t’i blejnë vetë.
Ministria e Shëndetësisë i tha Inside Story se mbetet e angazhuar për përmirësimin e vazhdueshëm të shërbimeve. Sa i përket të sëmundjeve onkologjike, Ministria thotë se janë marrë masa konkrete me qëllim lehtësimin e barrës shëndetësore, sociale dhe ekonomike.
Auditimi gjeti se shumë protokolle klinike në QSUT datojnë që nga viti 2014 dhe nuk janë përditësuar, duke rritur rrezikun e përdorimit të trajtimeve më pak efektive./Top Channel
