Lulzimi Basha dhe grupimi i tij do të mblidhen këtë të premte për të vendosur fatin e tyre politik, pasi humbën vulën e Partisë Demokratike, dy ditë më parë nga Gjykata e Apelit.
Takimi pritet të nisë në orën 14:00, teksa vjen pas atyre të dy ditëve më parë me Kryesinë dhe Kolegjin e Kryetarëve, ku pas takimeve nuk pati një vendim përfundimtar.
“Një gjë është e sigurt që demokrat nuk të bën vula, por vlerat dhe parimet. Parimet tona janë ato të një Shqipëria demokratike dhe europiane. Ne na lidhin shumë gjëra, por ajo që na lidh është se Shqipëria dhe shqiptarët meritojnë më shumë. Ne na lidh bindja me shqiptarët se ata meritojnë fundin e ciklit të dhimbshëm të tranzicionit. Për këtë si demokrat dhe si shqiptar marrim përgjegjësitë tona. Me këtë vetëdije do ta vazhdojmë bashkëbisedimin me shqiptarët dhe demokratët dhe më pas do ta vendosim. Ajo që kemi vendosur është që mos lëmë askënd pa marrë me vete në këtë vendimmarrje. Kjo betejë nuk ka qenë kurrë për vulë e për karrige. Ne do të gjejmë rrugën më të mirë. Duket qartë se është përvijuar koalicion antivlerash në horizont dhe ka alibi për të mbajtur Ramën në pushtet.
Kjo qeveri ka zvogëluar hapësirat për debat publik. PD dhe demokratët do të largojnë këtë qeveri, nëse vendimet i shërbejnë kësaj, do të ecim përpara. Nuk mund të mbajmë në këmbë pazare të vjetra. Ne luftojmë për interesat e njerëzve dhe jo personale. Nëse do të dish sesi ndihem, unë ndihem demokrat dhe ne kemi përgjegjësi ndaj të gjithë atyre që këtë betejë e bëjnë për idealet demokratike. Rama kundërshtar serioz të tij ka pasur vetëm Bashën.” – tha Lulzim Basha pas takimit të dy ditëve më parë.
Burime për mediat bëjnë me dije se juristët në grupimin e tij, që janë marrë me çështjet ligjore dhe zgjedhore, e kanë këshilluar Lulzim Bashën, që të mos humbasë më kohë me betejën për rekurs në Gjykatën e Lartë, edhe pse nuk është rrëzuar ende përfundimisht si skenar.
Dy skenarët më të mundshëm, të konfirmuara nga burime pranë grupimit të Bashës, janë krijimi i një force të re politike ose koalicion me partitë jashtë koalicionit të kreut të PD-së, Sali Berisha.
Egziston ende edhe skenari për të qenë si fraksion në Partinë Demokratike të drejtuar nga Sali Berisha, por ky duket skenari më pak i realizueshëm, pasi pjesa më e madhe e demokratëve nuk i pranojnë më Lulzim Bashën dhe Enkelejd Alibeajn.
Me shumë mundësi, Lulzim Basha do të krijojë një forcë të re politike një vit larg zgjedhjeve parlamentare të vitit 2025, teksa këtë gjë e deklaroi mbrëmjen e djeshme edhe kreu i grupit parlamentar të PD-së, Gazment Bardhi, referuar burimeve të tij. I ftuar në një emision televiziv, Bardhi tha se ka informacione që një pjesë e deputetëve të PD-së, ditë në vijim do të deklarojnë largimin nga grupi parlamentar i PD-së.
Ndërkohë, rrjedhjet tek grupi i Lulzim Bashës kanë nisur menjëherë pas humbjes së vulës. Dy deputetët Eralda Bano Tase dhe Kreshnik Çollaku deklaruan se do t’i bashkohen Partisë Demokratike të drejtuar nga Sali Berisha, duke e zvogëluar edhe më shumë grupin e vogël të deputetëve të Bashës, teksa nuk përjashtohet mundësia që në ditët në vijim të ketë dhe rrjedhje të tjera.
