Kreu i Partisë së Lirisë, Ilir Meta ka deklaruar se nuk ka patur kurrë besim tek SPAK, që kur u krijua, sipas tij në mënyrë të paligjshme.
Gjatë konferencës për mediat, Meta tha se Arta Marku, e zgjedhur në mënyrë të paligjshme me 69 vota si kryeprokurore, bëri ndryshime në të gjitha prokuroritë, ku më pas u zgjodh KLP-ja, e cila më pas përzgjodhi prokurorët e SPAK.
Meta deklaroi se SPAK nuk ka asnjë arritje, veç se ka gjymtuar sipas tij denoncimet e opozitës. Ai shtoi më tej se SPAK hap çështje ndaj gazetarëve dhe jo ndaj kryeministrit Edi Rama.
“Unë s’kam patur asnjëherë asnjë besim te SPAK se që kur u krijua, u krijua në mënyrë të paligjshme. A u zgjodh kryeprokurorja me 69 vota në mënyrë të paligjshme. Kjo prokurore a bëri ndërrime në të gjitha prokuroritë e Shqipërisë? Nga këta u zgjodh KLP-ja?
KLP-ja më pas zgjodhi SPAK-un! S’ka asnjë arritje të SPAK, SPAK vetëm ka gjymtuar denoncimet që ka bërë opozita. Ka ndërhyrë me shumë vonesë. SPAK vajti dhe hapi çështje ndaj gazetarëve, nuk hapi çështje ndaj Edi Ramës apo AKSHIT. Reaguan institucionet e juaja për të mbrojtur kolegët tuaj.
S’ndaloj askënd të ketë besim apo të bjerë në dashuri me SPAK, SPAK është aleati i Edi Ramës”, tha Meta.
