Një ngjarje e rëndë ka ndodhur në Milano, Itali, ku një shqiptar është vënë në pranga nga policia sepse ka qëlluar me armë ndaj fqinjit dhe ka sulmuar edhe familjen e tij.
Mediat italiane raportojnë se mes shqiptarit 48 vjeçar dhe fqinjit egjiptian, 56 vjeç, kishte pasur disa herë sherre, por këtë herë gjithçka ka përfunduar me përdorimin e armëve.
Shqiptari kishte marrë një pistoletë në dorë dhe ka qëlluar disa herë ndaj fqinjit të tij. Egjiptiani është larguar me vrap nëpër rrugë, por kjo nuk e ka ndaluar emigrantin nga Shqipëria që ta ndjekë atë dhe të qëllojë me armë edhe në rrugë.
Pasi e ka plagosur, shqiptari ka shkuar tek banesa e fqinjit dhe ka tentuar të hapë derën.
Në vendin e ngjarjes ka mbërritur policia që ka bërë rrethimin dhe më pas ndalimin e shqiptarit.
Egjiptiani është dërguar në spital ku ndodhet jashtë rrezikut për jetën.
